ŞUŞALILAR MÜNAQİŞƏNİN SÜLH YOLU İLƏ HƏLLİNİ DƏSTƏKLƏYİRLƏR
Dövlət himni səsləndikdən və şəhidlərin xatirəsi bir dəqiqəlik sükutla yad edilib ruhlarına dua oxunduqdan sonra cəmiyyətin sədri Zahid Quliyev hesabat dövründə qurumun gördüyü işlər barədə məlumat vermişdir. Natiq Ermənistan-Azərbaycan, Dağlıq Qarabağ münaqişəsi, onun həlli istiqamətində atılan addımlarla əlaqədar fikirlərini bölüşmüş, bu işə qoşulmuş beynəlxalq qurumların fəaliyyətinə münasibətini bildirmişdir. O qeyd etmişdir ki, şuşalılar münaqişənin dinc yolla həllini dəstəkləsələr də, Ali Baş Komandanın əmri ilə silaha sarılıb ölkəmizin ərazi bütövlüyünü təmin etməyə hazırdırlar. Heç bir şuşalı doğma şəhərin, Qarabağ torpaqlarının düşmən tapdağında qalması ilə barışmayacaqdır.
Çıxış edənlər ermənilərin Şuşada, işğal olunmuş digər ərazilərdə tarix, mədəniyyət və memarlıq abidələrimizi dağıtdıqlarını hiddətlə yada salmış, onların fitnəkarlıqlarını və son zamanlar genişləndirdikləri böhtan kampaniyasını pisləmiş, azğınlaşmış düşməni yerində oturtmaq üçün birliyə çağırmışlar. Xüsusi vurğulanmışdır ki, Azərbaycanın ərazi bütövlüyü məsələsi milli mənafe ilə bağlıdır.
Zahid Quliyev yenidən cəmiyyətin sədri, akademik Cəlal Allahverdiyev isə qurumun məclisinin sədri seçilmişlər.
Konfrans iştirakçıları Şuşanın tarixi Azərbaycan şəhəri olması, ermənilərin tarixi saxtalaşdırmaq cəhdləri ilə əlaqədar beynəlxalq qurumlara, o cümlədən BMT-yə, YUNESKO-ya və Avropa Şurasına bəyanat qəbul etmişlər.
Bölmənin digər xəbərləri
