ŞUŞANIN İŞĞALINDAN 16 İL ÖTÜR
AZƏRTAC xəbər verir ki, mayın 8-də “Həsrət Yolu” Əsir və Girovlara Kömək İctimai Birliyi gənclər təşkilatının təşəbbüsü ilə Şuşanın işğalının 16-cı ildönümünə həsr olunmuş “Xarı bülbül həsrətlə bizi gözləyir” mövzusunda tədbir keçirilmişdir.
İctimai Birliyin sədri Esmira Orucova, gənclər təşkilatının sədri Nüşabə Bağırova, Ermənistanın ölkəmizə hərbi təcavüzü nəticəsində əsir götürülmüş şəxslərin ailə üzvləri və yaxınları çıxış edərək bildirmişlər ki, özünü dünyaya “soyqırıma məruz qalmış millət” kimi tanıdan, tarixi, mədəniyyəti, adət-ənənəsi bəlli olmayan ermənilər əsrlər boyu Azərbaycanın torpaqlarına, tarixinə, mədəniyyətinə göz dikmişlər.
1992-ci il mayın 8-də Azərbaycanın dilbər guşəsi, musiqi və mədəniyyət beşiyi olan Şuşa Ermənistan hərbi birləşmələri tərəfindən işğal olunmuş, nəticədə 289 kvadratkilometr ərazi təcavüzə məruz qalmış, mədəni və inzibati binalar dağıdılmış, yüzlərlə insan qətlə yetirilmiş, 121 nəfər itkin düşmüşdür.
Şuşanın tarixini, mədəni abidələrini və işğaldan sonrakı görünüşünü əks etdirən film nümayiş etdirilmişdir.
Natiqlər vurğulamışlar ki, erməni separatçılarının Azərbaycanın ayrılmaz hissəsi olan Dağlıq Qarabağı Ermənistana birləşdirmək iddiaları ilə başlayan amansız müharibə nəticəsində ərazilərimizin 20 faizi işğal olunmuş, 1 milyondan çox insan öz doğma yurdundan zorla qovularaq məcburi qaçqın və köçkün kimi yaşamağa məcbur edilmişdir.
Tədbirdə “Həsrət Yolu” Əsir və Girovlara Kömək İctimai Birliyi gənclər təşkilatının üzvləri və Şuşanın işğalı zamanı əsir və itkin düşmüş, girov götürülmüş, şəhid olmuş soydaşlarımızın yaxınlarının terrorçu Ermənistan dövlətinin xalqımızın başına gətirdiyi müsibətlərə laqeyd yanaşan bəzi beynəlxalq təşkilatlara etiraz müraciəti qəbul edilmişdir.
