Tarixi oyunun iştirakçısı: “Fənərbağça” ilə matçdan sonra Türkiyə klublarından təklif almışdım
Bakı, 12 noyabr, AZƏRTAC
“1994-cü il yaddaşımda xoş xatirə olaraq qalacaq. Çünki həmin il ilk dəfə Azərbaycan klubu avrokuboklarda debüt etdi”.
Bu sözləri AZƏRTAC-a açıqlamasında Azərbaycanın veteran futbolçusu Vidadi Rzayev 1994-cü ildə “Turan”ın heyətində UEFA Kubokunda Türkiyənin “Fənərbağça” komandasına qarşı keçirdikləri tarixi oyunları (0:5, 0:2) xatırlayarkən deyib.
O, Türkiyə nəhəngi ilə görüşlərin özləri üçün böyük təcrübə olduğunu bildirib: “İstanbuldakı ilk görüşdə olmasam da, Sumqayıtda keçirilmiş cavab qarşılaşmasında meydanda idi. Əla hisslər keçirmişdim. Çünki müstəqillik qazandıqdan sonra ilk dəfə avrokuboklarda təmsil olunurduq. Düşünürəm ki, hər iki matç Azərbaycan futbolunun tarixində silinməz iz qoyub. Çünki həmin dövrdən etibarən futbolumuz inkişaf etməyə başladı”.
Keçmiş hücumçu “Fənərbağça” ilə oyundan sonra bir sıra klublardan transfer təklifləri aldığını söyləyib: “Bu matçdakı çıxışımız menecerlərin diqqətini cəlb etmişdi. Hətta mənə Türkiyənin bəzi klublarından təkliflər gəlmişdi”.
Ötən gün Tovuz şəhər stadionunda “Turan” və “Kəpəz” komandalarının veteran futbolçuları arasında keçirilmiş matçda (5:5) iştirak edən V.Rzayev həmin görüşün onu keçmişə qaytardığını deyib: “Yoldaşlıq qarşılaşması “Turan”ın çempionluğu və ölkəmizi ilk dəfə qitəmiqyaslı yarışda təmsil etməsinin 30 illiyi ilə əlaqədar təşkil olunmuşdu. Buna görə hər iki klubun rəhbərliyinə təşəkkürümü bildirirəm. Aradan uzun illər keçsə də, keçmiş komanda yoldaşlarımla həmin dövrləri yada saldıq”.
Bölmənin digər xəbərləri
