TBİLİSİDƏ BEYNƏLXALQ KONFRANS KEÇİRİLMİŞDİR
Gürcüstan Respublikasının paytaxtı Tbilisi şəhərində “Cənubi Qafqazda su ehtiyatlarının istifadəsi, qorunması sahəsində hüquqi məsələlər və qanunvericiliyin təkmilləşdirilməsi istiqamətində beynəlxalq standartların tətbiqi təcrübəsi” mövzusunda beynəlxalq konfrans keçirilmişdir. Azərbaycan Respublikasının İnsan hüquqları üzrə Müvəkkili (Ombudsman) Aparatının Elmi-analitik şöbəsinin baş məsləhətçisi Aydın Səfixanlı həmin konfransda “Azərbaycanda su hövzələrinin qorunması və istifadəsinin hüquqi məsələləri, bu sahədə ratifikasiya edilmiş beynəlxalq konvensiyalar və Ombudsmanın ekoloji hüquqların qorunmasında rolu” mövzusunda çıxıs etmişdir. Məruzəçi çıxışında ölkəmizin içməli su mənbələrinin mühafizəsi sahəsində mühüm problemlərin olduğunu, xüsusilə Kürün Ermənistan ərazisində zəhərli tullantılarla çirkləndirilməsini, Gürcüstan ərazisində isə mühafizəsinin lazımi səviyyədə təşkil olunmamasını nəzərə çatdırmışdır. Aydın Səfixanlı Ermənistanın Azərbaycana təcavüzü nəticəsində torpaqlarımızın 20 faizinin işğal altında olmasını və bu ərazilərdə bir çox içməli su ehtiyatlarının həyat üçün təhlükəli maddələrlə çirkləndirilməsini vurğulamışdır. O eyni zamanda təmsil etdiyi təsisatın bilavasitə insanların ekoloji hüquqlarının müdafiəsi ilə bağlı fəaliyyəti barədə ətraflı məlumat vermişdir.
