İQTİSADİYYAT
“Təbii qazdan təhlükəsiz istifadə aylığı” elan edilmişdir
Bakı, 31 oktyabr (AZƏRTAC). Payız-qış mövsümündə istehlakçıların təbii qazla daimi və təhlükəsiz təchiz edilməsi, abonentlərin təbii qazdan istifadə qaydaları barədə təlimatlandırılması və maarifləndirilməsi məqsədi ilə “Azəriqaz” İstehsalat Birliyi (İB) noyabrın 1-dən dekabrın 1-dək respublika ərazisində “Təbii qazdan təhlükəsiz istifadə aylığı” elan etmişdir.
İB-nin mətbuat xidmətindən AZƏRTAC-a bildirmişlər ki, bununla əlaqədar xüsusi tədbirlər planı hazırlanmışdır. Planda abonentlərin təbii qazdan istifadə qaydalarına dair növbədənkənar təlimatlandırılması nəzərdə tutulmuşdur.
Təbii qazdan istifadə qaydalarını pozan istehlakçıların qaz təchizatı müqavilə ilə müəyyən edilmiş qaydada dayandırılacaqdır. Tədbirlər planında, həmçinin qəza halları barədə qaz istismar sahələrinin qəza dispetçer xidmətlərinə daxil olmuş çağırışların keyfiyyətlə yerinə yetirilməsinə nəzarətin gücləndirilməsi məsələsi də yer almışdır. Qeyri-standart qaz cihazları və avadanlığın istismardan çıxarılmasına nəzarət də gücləndiriləcəkdir.
“Təbii qazdan təhlükəsiz istifadə aylığı” çərçivəsində qaz təsərrüfatı obyektlərinə və avadanlığa baxışların sayı artırılacaqdır.
Qeyd edilən müddətdə bütün qaz istismar sahələri gücləndirilmiş iş rejiminə keçiriləcək, məsul şəxslərdən ibarət növbətçilik sistemi təşkil olunacaqdır.