TƏHSİL NAZİRİ MİSİR MƏRDANOVUN ÇIXIŞI
Hörmətli müəllimlər və valideynlər,
Əziz şagirdlər!
Cənab Prezident, icazə verin, yeni dərs ilinin başlanması - “Bilik günü” münasibətilə ölkənin çoxminli təhsil işçiləri adından Sizi təbrik edim və müstəqil Azərbaycanın inkişafı naminə şərəfli fəaliyyətinizdə uğurlar arzulayım.
Bu gün ölkəmizin 4547 məktəbində milyon yarımdan çox şagird yeni dərs ilinə başlayır. 127 min birinci sinif şagirdi məktəbə ilk dəfə qədəm qoyur.
Cənab Prezident, ümummilli rəyi ifadə edərək, iftixar hissi ilə vurğulamaq istəyirəm ki, Sizin müstəsna təşkilatçılığınız, uğurlu daxili və xarici siyasətiniz nəticəsində Azərbaycan qısa zaman ərzində iqtisadi inkişaf sürətinə görə dünyada ön sıraya çıxmışdır. Bütün bunlar milli təhsilimizin aydın inkişaf konsepsiyasının müəyyənləşdirilməsinə, bir neçə il ərzində təhsilin prioritetləri ilə bağlı elmi surətdə əsaslandırılmış 16 dövlət proqramının hazırlanmasına və həyata keçirilməsinə zəmin yaratmışdır. Nəticələr isə göz qabağındadır.
Orta məktəb dərsliklərinin şagirdlərə pulsuz verilməsinin birinci mərhələsi başa çatmış, məktəb tikintisi geniş vüsət almış, məktəblərin kompyuterlə, avadanlıqla, kadrlarla təminatı, istedadlı uşaq və gənclərlə iş, xüsusi qayğıya ehtiyacı olan uşaqların təhsili, de-institutlaşdırma və digər əhəmiyyətli məsələlər isə öz həllini tapmaqdadır.
Hörmətli cənab Prezident, icazənizlə, 2006-cı ildə təhsil sahəsində Sizin birbaşa rəhbərliyinizlə həyata keçirilən tədbirləri yüksək diqqətinizə çatdırım.
Cari ildə 100 mindən çox şagird yerlik 288 yeni məktəb binasının və əlavə korpusların inşasına başlanıbdır. Heydər Əliyev Fondu tərəfindən 100-dən çox məktəb tikilir. Tikintisi bu il başa çatdırılan məktəblərdə şagird yerlərinin sayı ötən ildəkinə nisbətən 2 dəfə çoxdur. Bu günədək 145 məktəb binası və əlavə korpuslar tikilib istifadəyə verilmiş, 344 məktəb əsaslı təmir edilmiş, 248 məktəb müasir avadanlıqla təmin olunmuş, 841 məktəbin kompyuterləşdirilməsi, 435 məktəbə noutbuk və proyektorların verilməsi nəzərdə tutulmuşdur. 2006-cı ildə 5 milyondan çox nüsxə dərslik çap edilərək məktəblərə çatdırılmışdır.
Cənab Prezident, Sizin tapşırığınıza əsasən, Gürcüstandakı soydaşlarımızın uşaqlarına çatdırmaq üçün 70 min nüsxədən çox zəruri dərsliklər artıq göndərilmişdir.
Cari ildə 4000-dən çox müəllim işlə təmin edilmiş, onlardan 1000 nəfəri ən çox ehtiyacı olan ucqar kəndlərə göndərilmişdir.
Cənab Prezident, ümummilli liderimiz Heydər Əliyevin təsdiq etdiyi proqrama əsasən, təhsilin məzmunu sahəsində islahatlar kurrikulum islahatları adı altında aparılır. Hazırlanmaqda olan fənn kurrikulumlarının tətbiqinə gələn dərs ilində 1-ci siniflərdən başlanacaqdır. Təhsil alanların biliyinin qiymətləndirilməsi üzrə yeni mexanizmin tətbiq edilməsi sahəsində ötən il həyata keçirilmiş uğurlu eksperimentlər bu il daha da genişləndiriləcəkdir. Biz yaxşı başa düşürük ki, aparılan islahatların nəticəsi birbaşa müəllimlə bağlıdır. Ona görə də müəllim hazırlığı sisteminin təkmilləşdirilməsinə yönəlmiş “Pedaqoji təhsilin konsepsiya və strategiyası” hazırlanmışdır.
Cənab Prezident, Sizin sərəncamınızla Bakı şəhəri üzrə təhsil idarəsinin birbaşa Təhsil Nazirliyinin tabeliyinə verilməsi məsuliyyətimizi daha da artırmışdır. Sizi əmin edirəm ki, bu etimadınızı hökmən doğruldacağıq.
Möhtərəm Prezident, ötən il dekabrın 29-da bu gün açılışına toplaşdığımız məktəbin təməlini qoymuşdunuz. Məktəbin tikintisinə bu ilin aprelindən başlanmış, 5 ay ərzində tikilib qurtarmışdır. Tikintiyə 2,6 milyon manat vəsait sərf edilmişdir. Məktəbdə bir növbədə 1176 şagird təhsil alacaq, 70 sinif və digər yardımçı otaqlar, o cümlədən 3 laboratoriya, 2 kompyuter otağı, kitabxana, idman meydançası və salonu, 300 nəfərlik akt salonu, yeməkxana ən müasir avadanlıqla təmin edilmişdir.
Məktəbə bu günə qədər 1000-dən çox şagird qəbul olunmuş, burada 50-dən çox müəllim işlə təmin olunmuşdur. Məktəb öz qapılarını uşaqların üzünə açmaqla bu yaşayış massivində uzun illər həsrətdə olan valideynləri və uşaqları hədsiz sevindirmişdir. Minlərlə insana bu sevinci bəxş etdiyinizə görə, Sizə dərin təşəkkürümüzü və minnətdarlığımızı bildiririk.
Möhtərəm cənab Prezident!
Təhsilimizin ilbəil inkişafı, qazanılan uğurlar göz qabağındadır. Mübaliğəsiz demək istəyirəm ki, bütün bu nailiyyətlər və uğurlar Sizin təhsil sisteminə göstərdiyiniz diqqət və qayğının birbaşa nəticəsidir. Əsas vəzifəmiz nailiyyətləri daha da möhkəmləndirmək, dünya təhsil təcrübəsində ən mütərəqqi ideyaları mənimsəyib yaradıcı şəkildə tətbiq etmək və Sizin böyük etimadınızı doğrultmaqdan ibarətdir.
Cənab Prezident, Sizi və ölkə ictimaiyyətini əmin etmək istəyirəm ki, Azərbaycan təhsili özünün zəngin mütərəqqi ənənələrinə, milli-mənəvi və ümumbəşəri dəyərlərə, beynəlxalq təcrübəyə əsaslanaraq daha da inkişaf edəcək, dünya təhsil sistemində öz layiqli yerini tutacaqdır.
Yeni dərs iliniz bir daha mübarək olsun!
Bölmənin digər xəbərləri
