Tələbə gənclər Zəfər Günü və Bayraq Günü ilə əlaqədar silsilə tədbirlər keçiriblər
Bakı, 8 noyabr, AZƏRTAC
Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsindəki Şanlı Zəfərindən 3 il ötməsi və 9 Noyabr - Bayraq Günü münasibətilə Azərbaycan Tələbə Gənclər Təşkilatları İttifaqı (ATGTİ) və üzv Tələbə Gənclər Təşkilatları tərəfindən silsilə tədbirlər keçirilib.
Qurumdan AZƏRTAC-a bildiriblər k, ATGTİ və Tələbə Gənclər Təşkilatlarının 3 mindən çox aktivi Ümummilli Lider Heydər Əliyevin məzarını və İkinci Şəhidlər xiyabanını ziyarət ediblər.
Azərbaycan Respublikası Gənclər Fondunun dəstəyi, ATGTİ, “İrəli” İctimai Birliyi və Tələbə Gənclər Təşkilatlarının birgə təşkilatçılığı ilə “Bayraqdar” layihəsi çərçivəsində gənclər arasında qəhrəman qazi və döyüşçülərimizin tanıdılması məqsədilə görüşlər keçirilib. Görüşlər paytaxt və regionlarda yerləşən ali təhsil müəssisələrində təşkil edilib.
Eyni zamanda, İttifaq tərəfindən Gənclər Fondunun dəstəyi ilə reallaşan layihələr çərçivəsində Vətən müharibəsində qazanılan Qələbə və Bayraq Gününün qeyd olunması məqsədilə ali və orta ixtisas təhsili müəssisələrinin Tələbə Gənclər Təşkilatları tərəfindən “Qələbə”, “Müstəqilliyimiz əbədidir”, “Şəhidlər ölməz, Vətən bölünməz!”, “Heydər Əliyevin şah əsəri: müstəqil və qalib Azərbaycan”, “Uğura gedən yol”, “Dastana döndü”, “Bayraq Günü”, xarici dillərdə Azərbaycanın Zəfəri haqqında tələbələrin məlumatlandırılması məqsədilə “Victory Day” adlı tədbir, “Qarabağ, sən azadsan!” adlı tədbir, Hərbi Qənimətlər Parkına ekskursiya, “Atadan-oğula” adlı dəyirmi masa, “Zəfər Günü” intellektual yarışı və bir çox müxtəlif istiqamətli görüşlər, konfranslar, konsert proqramları və dəyirmi masalar keçirilib.
Tələbə gənclərin vətənpərvərlik, musiqi, intellektual oyunlar klubları, mədəniyyət klubları və debat klubları şəbəkələrinin təşkilatçılığı ilə silsilə tədbirlər də reallaşıb. Vətənpərvərlik klubu tərəfindən “Qələbə rəmzi”, “Bayraq mənliyimdir”, “Unutmadıq, unutmarıq” adlı tədbirlər keçirilib. Mədəniyyət klubları şəbəkəsi tərəfindən müxtəlif videoçarxlar nümayiş etdirilib, vətənpərvərlik mövzusunda müxtəliflər tədbirlər, “Zəfər” debat turniri təşkil olunub.
Həmçinin Xarici dillər klubları şəbəkəsi tərəfindən Bakı Slavyan Universitetində xarici və yerli tələbələrin iştirakı ilə Azərbaycan, onun tarixi və əlamətdar günləri haqqında ətraflı məlumatları çatdırmaq məqsədilə ingilis və rus dillərində “Bayraq Günü - xarici tələbələrin gözündə” adlı tədbir, müəllim və tələbə kollektivinin iştirakı ilə “Zəfərimizin dünəni, bu günü və gələcəyi” haqqında dəyirmi masalar keçirilib. Tarix klubları şəbəkəsi tərəfindən “Əsrin Fatehi” adlı tədbir, “Zəfər paradı” adlı intellektual yarış və digər layihələr həyata keçirilib.
Bölmənin digər xəbərləri
