TƏLƏBƏ QƏBULU ÜZRƏ DÖVLƏT KOMİSSİYASINDA MƏTBUAT KONFRANSI KEÇİRİLMİŞDİR
Komissiyanın sədri Məleykə Abbaszadə “Abituriyent” jurnalının 2-ci nömrəsinin nəşr olunduğunu və bu nömrədə 2006�7-ci tədris ili üçün ali məktəblərin bakalavr və magistr pillələrinə tələbə qəbulu qaydalarının verildiyini bildirmişdir.
Qeyd olunmuşdur ki, “Qəbul qaydaları” 2006-cı ildə ali təhsil ocaqlarına tələbə qəbulu prosesini tənzimləyən rəsmi normativ sənəddir.
Ali məktəblərə tələbə qəbulu qaydalarında ciddi dəyişiklik olmadığını söyləyən M.Abbaszadə ali təhsil müəssisələrinə daxil olmaq istəyən gənclərə metodiki kömək məqsədi ilə jurnalda qəbul imtahanlarının modeli əsasında hazırlanmış test tapşırığı nümunələri, onların düzgün cavabları, balların hesablanması üçün cədvəl, fənlər üzrə çətin testlərin izahı və s. dərc edildiyini də diqqətə çatdırmışdır.
Komissiyanın sədri bildirmişdir ki, ali məktəblərin magistraturasına “Qəbul qaydaları”nda müəyyən dəyişiklik edilmişdir. Belə ki, ali təhsilin bu pilləsinə qəbul bir mərhələdə keçiriləcəkdir. Qəbul aparılan bütün ixtisas istiqamətləri müxtəlif proqramlar əsasında qruplaşdırılmışdır. Həmin proqramlar qəbul imtahanlarının məzmununu müəyyən edir, test tapşırıqları da onların əsasında tərtib olunacaqdır.
Nəzərə çarpdırılmışdır ki, magistraturaya qəbulda bakalavrlar eyni proqram çərçivəsində 5-dək ixtisas kodu seçə bilərlər.
M.Abbaszadə jurnalistləri maraqlandıran sualları da cavablandırmışdır.
Bölmənin digər xəbərləri
