Teymur Rəcəbovun komandası Millətlər Kubokunda ilk qələbəsini qazanıb
Bakı, 5 may, AZƏRTAC
Şahmat üzrə onlayn Millətlər Kubokunda qrossmeysterimiz Teymur Rəcəbovun da yer aldığı dünya yığması ilk qələbəsini qazanıb.
AZƏRTAC xəbər verir ki, ikinci raundda Hindistan yığması ilə mübarizə aparan dünya komandası rəqibini 2,5:1,5 hesabı ilə məğlub edib. Teymur Rəcəbov Vişvanatan Anand, FIDE təmsilçisi Əlirza Firuzca Pentala Harikrişna, ukraynalı Mariya Muzıçuk Hampi Koneru ilə heç-heçə ediblər. Yığmanın üzvü perulu Xorxe Korinin Başkaran Adhibanı məğlub etməsi komandanın qələbəsini təmin edib.
İkinci raundun digər oyunlarında ABŞ Rusiya yığmasını, Çin Avropa komandasını 3:1 hesabı ilə məğlub edib.
Qeyd edək ki, bu gün keçirilmiş birinci raundun oyunlarında dünya yığması Çin komandasına 1:3 hesabı ilə məğlub olub, Avropa Rusiya, Hindistan ABŞ yığmaları ilə heç-heçə ediblər.
Altı komandanın iştirakı ilə keçirilən yarışın mükafat fondu 180 min ABŞ dollarıdır.
Bölmənin digər xəbərləri
