Tomas Bax: Paris Olimpiadası hərbi münaqişələrin artması səbəbindən təxirə salınmayacaq
Bakı, 13 noyabr, AZƏRTAC
Beynəlxalq Olimpiya Komitəsi (BOK) hərbi münaqişələrin artması səbəbindən 2024-cü ildə Parisdə keçiriləcək Olimpiya Oyunlarının təxirə salınması variantını nəzərdən keçirmir.
AZƏRTAC xəbər verir ki, bu barədə BOK-un rəhbəri Tomas Baxın “Inside the Games” portalında dərc edilmiş şərhində bildirilir.
Tomas Bax vurğulayıb: “Hazırda çox mürəkkəb geosiyasi gərginlik mövcuddur, amma bizim Paris Olimpiya Oyunlarından vaz keçəcəyimizi söyləmək tamamilə yanlış yanaşma olardı. Dünyada hökumətlər və ölkələr arasında çoxlu sayda müharibələr baş verib, lakin idmançılar həmişə Olimpiya Oyunlarında iştirak edib və bu, Olimpiya missiyasına uyğundur. Mən dünya müharibəsinin baş verə biləcəyini bilmirəm, ancaq Beynəlxalq Olimpiya Komitəsi idmanın əsas ideyasına xəyanət edə bilməz.
Hazırda dünyada 28 müharibə var. Bizim missiyamız idmançılar və idman naminə humanitar missiyadır. Biz bunu nəzərə almağa çalışırıq, insanlar onları birləşdirən amillərə möhtacdır”.
Parisdə Olimpiya Oyunları 2024-cü il iyulun 26-dan avqustun 11-dək keçiriləcək. Əvvəllər olduğu kimi, Rusiya və Belarus idmançılarının yarışlarda iştirakı məsələsi həll olunmamış qalır.
Bölmənin digər xəbərləri
