TURİZM VƏ SƏYAHƏTLƏR SƏRGİSİNDƏ 10 ÖLKƏDƏN 42 ŞİRKƏT İŞTİRAK EDƏCƏK
Heydər Əliyev adına İdman-Konsert Kompleksində aprelin 20-də açılacaq 5-ci turizm və səyahətlər sərgisində 10 ölkədən 42 şirkət iştirak edəcəkdir. Mədəniyyət və Turizm Nazirliyinin nümayəndələri aprelin 19-da Beynəlxalq Mətbuat Mərkəzində keçirilən mətbuat konfransında jurnalistlərə bildirmişlər ki, sərgidə Azərbaycanın 10 turizm şirkəti təmsil olunacaqdır. Ekologiya və Təbii Sərvətlər Nazirliyi sərgidə ilk dəfə Azərbaycanın ekoloji turizm sahəsində imkanlarına dair stend təşkil edəcəkdir. Dünya Turizm Təşkilatının, Mədəniyyət və Turizm Nazirliyinin, Ticarət və Sənaye Palatasının, Azərbaycanın Turizm Sənayesinin İnkişafı İttifaqının və Britaniyanın İTE Group PLC sərgi şirkətinin dəstəyi ilə təşkil olunan sərginin baş sponsoru “Azərbaycan Hava Yolları” Dövlət Konsernidir.
Aprelin 22-dək davam edəcək sərgidə aviaxətlər və aviaşirkətlər, turizm operatorları, mehmanxana biznesi, idman, ekologiya və maarifləndirmə turizmi, sığorta və bank xidmətləri təmsil olunacaqlar.
Futbol azarkeşləri bu ilin yayında Almaniyada keçiriləcək dünya futbol çempionatına tur ala biləcəklər. Bu imkanı “Sport Tours” şirkəti yaradacaqdır.
Bölmənin digər xəbərləri
