TÜRKİYƏ ORDUSU KÜRD YARAQLILARINI İZLƏYİR

28.04.2006 [16:12]
Çap et
A⁺ A^-

AZƏRTAC İTAR-TASS-a istinadla xəbər verir ki, Türkiyə ordusunun bölmələri aprelin 27-də gecə Şimali İraqdan ölkə ərazisinə keçməyə cəhd göstərmiş kürd yaraqlılarını təqib etməkdədir. Onları məhv etmək üçün dağ komandosları dəstələri İraqın şimalında bir sıra sərhədyanı bölgələrə daxil olmuşlar. Ərazini terrorçulardan təmizləmək əməliyyatına döyüş vertolyotları, artilleriya və zirehli texnika cəlb edilmişdir.

Xarici işlər naziri Abdullah Gül təsdiqləmişdir ki, türk ordusu İraqla sərhəddə misli görünməmiş iri qoşun bölmələri cəmləşdirmişdir. Onun sözlərinə görə, bu, iraqlıların mənafelərinə uyğundur. Nazir demişdir: “Əgər iraqlılar terrorla mübarizə üçün hələlik qüvvəyə malik deyilərsə, onda həyata keçirdiyimiz təhlükəsizlik tədbirlərini alqışlamalıdırlar”. O vurğulamışdır ki, Ankaranın yeganə məqsədi terrorçuların Türkiyəyə soxulmasına yol verməməkdir.

Ölkə mətbuatının məlumatına görə, hazırda Türkiyənin cənub-şərq vilayətlərində, İraq və İranla sərhəddə 240 minlik qoşun qrupu cəmləşdirilmişdir.