TÜRKMƏNİSTANDA SÜRÜCÜLÜK VƏSİQƏSİ ALMAQ İSTƏYƏNLƏR “RUHNAMƏ”Nİ ÖYRƏNMƏLİDİRLƏR
AZƏRTAC “Novosti” agentliyinə istinadla xəbər verir ki, Türkmənistanda avtomobil sürücüləri məktəblərində Prezident Saparmurad Niyazovun “Ruhnamə” adlı əsərini də öyrənəcəklər. Türkmənistan Prezidentinin aparatından bildirmişlər ki, indən belə Müdafiə Nazirliyinin tabeliyinə keçən avtomobil məktəbləri üçün yeni proqramın müəllifləri əmindirlər ki, “bu yenilik nəinki peşə hazırlığının yüksək səviyyəsini təmin etməyə, həm də gələcək sürücüləri türkmən cəmiyyətinin ülvi əxlaqi dayaqları ruhunda tərbiyələndirməyə imkan verəcəkdir”.
Gözlənildiyinə görə, sürücülər hazırlanmasının yeni sistemi yollarda qayda-qanunu və hərəkətin təhlükəsizliyini keyfiyyətcə yeni səviyyəyə qaldırmağa imkan yaradacaqdır.
Avtomobillərin texniki quruluşu üzrə məşğələlərə 20 saat ayrılır. S.Niyazovun yaradıcılığını isə gələcək sürücülər cəmi 16 saat öyrənəcəklər.
