Bakı, 21 sentyabr, AZƏRTAC

Azərbaycan Milli Elmlər Akademiyasında (AMEA) Humanitar Elmlər Bölməsi və Memarlıq və İncəsənət İnstitutunun təşkilatçılığı ilə Türkiyə Cümhuriyyətinin yaradılmasının 100 illiyinə həsr olunmuş “Türkoloji sənətşünaslıq: problemlər və perspektivlər” mövzusunda IV beynəlxalq elmi konfrans keçirilib.

AZƏRTAC xəbər verir ki, AMEA-nın prezidenti akademik İsa Həbibbəyli Türk Dövlətləri Təşkilatının yaradılmasının türk dövlətlərinin birliyinin təmin olunması baxımından böyük siyasi əhəmiyyətə malik olduğunu vurğulayıb. Azərbaycan Respublikasının Prezidenti İlham Əliyevin türk dövlətləri ilə əlaqələrin inkişaf etdirilməsini ölkəmizin prioritet istiqaməti kimi müəyyənləşdirdiyini bildirən AMEA prezidenti bugünkü beynəlxalq konfransın türk dövlətləri ilə elmi istiqamətdə əlaqələrin qurulması baxımından önəmini xüsusi qeyd edib.

Akademik İsa Həbibbəyli AMEA-nın Türkiyə, Özbəkistan, Qazaxıstan, Qırğızıstan və Türkmənistanın müvafiq elmi qurumları ilə əməkdaşlıq əlaqələrinin uğurla davam etdirildiyini diqqətə çatdırıb. AMEA rəhbəri tədbirin Türk dünyası ilə elmi-mədəni əlaqələrimizin genişləndirilməsinə imkan verəcəyini qeyd edib, konfransın işinə uğurlar arzulayıb.

Memarlıq və İncəsənət İnstitutunun baş direktoru AMEA-nın müxbir üzvü Ərtegin Salamzadə “Türkoloji sənətşünaslığın problemləri və metodları” mövzusunda məruzə ilə çıxış edib. O, institutda türkoloji sənətşünaslığa dair aparılan tədqiqatların nəticələrini təqdim edib, Azərbaycan incəsənətinin dövrləşdirilməsi konsepsiyasına dair elmi mülahizələrini nəzərə çatdırıb.

Tədbirdə, həmçinin Özbəkistandan gəlmiş professor Kamola Akilovanın “XIII-XIV əsrlər Səlcuk türkləri incəsənətinin bədii xüsusiyyətləri problemlərinə dair”, professor Rəna Abdullayevanın “Türk kinosunda davranışın mədəni stereotipləri”, sənətşünaslıq üzrə fəlsəfə doktoru, dosent Nərminə Ağayevanın “Azərbaycan və Türkiyə teatr əlaqələri”, sənətşünaslıq üzrə fəlsəfə doktoru, dosent Xəzər Zeynalovun “Azərbaycan təsviri sənətində Türkiyə mövzusu”, sənətşünaslıq üzrə fəlsəfə doktoru Ramil Quliyevin “Türk dünyasının ortaq dili: xalça naxışları”, professor Sevil Fərhadovanın “Tamlığın reallığı Türk dünyasının mədəni strateji vektoru kimi”, qazaxıstanlı professor Mehribanu Qlaudinovanın “Xəzəryanı şəhərlərin təbiət-iqlim problemi kontekstində Qərbi Qazaxıstan memarlığının identikliyi” və memarlıq üzrə fəlsəfə doktoru, dosent Sevinc Tangudurun “Cümhuriyyət dövrü İstanbul memarlığı” mövzularında məruzələri dinlənilib.