UİLYAM RAMSEY: 2015-Cİ İLƏDƏK AVROPANI QAZ QITLIĞI GÖZLƏYİR
AZƏRTAC xarici informasiya agentliklərinə istinadla xəbər verir ki, 2015-ci ilədək Avropanı qaz qıtlığı təhlükəsi gözləyir. Bunu MDB-nin Parisdə keçirilən neft və qaz sammitində Beynəlxalq Enerji Agentliyi direktorunun müavini Uilyam Ramsey bildirmişdir. Onun sözlərinə görə, həmin vaxtadək “Qazprom” Avropa İttifaqında mavi yanacağa artmaqda olan tələbatı təmin etmək iqtidarında olmayacaqdır.
Avropa İttifaqına qaz nəqli Rusiyanın ixrac etdiyi bütün qazın 84,8 faizini təşkil edir ki, bu da Aİ ərazisində istehlak olunan qazın 26,3 faizi deməkdir. Rusiya Təbii Ehtiyatlar və Ekologiya Nazirliyindən bildirmişlər ki, 2020-ci ilədək Rusiyada qaz hasilatı artaraq 800-900 milyard kubmetrə çatacaq və bu da Avropanın artmış tələbatını ödəməyə imkan verəcəkdir.
“Qazprom”da Uilyam Ramseyin bəyanatına şübhə ilə yanaşmışlar. Bildirilmişdir ki, 2020-ci ilədək 650-670 milyard kubmetr qaz çıxarmaq planlaşdırılır. Rusiyanın özü təxminən 450 milyard kubmetr, keçmiş SSRİ ölkələri istisna olmaqla, Avropa isə 520 milyard kubmetr qaz istehlak edir.
Təbii İnhisarlar Problemləri İnstitutu ekspertlərinin fikrincə, qaz hasilatını əhəmiyyətli dərəcədə artırmaq üçün geoloji kəşfiyyat işlərinə və yeni yataqların işlənməsinə sərmayə çatışmır ki, bu da çox vaxt qaz şirkətlərinin ixraca üstünlük verməsi ilə bağlıdır.
Bölmənin digər xəbərləri
