DÜNYA
Ukraynada əhalinin 90 faizi parlament seçkilərində səsvermədə iştiraka hazırdır
Kiyev, 22 may, AZƏRTAC
Yaxın günlərdə Ukraynada növbədənkənar parlament seçkiləri keçirilsə, əhalinin 90 faizi səsvermədə iştirak edəcək.
AZƏRTAC xəbər verir ki, bu barədə “Reytinq” Sosial Qrupu son rəy sorğusunun nəticələrində məlumat verib.
Sorğuya əsasən Vladimir Zelenskinin “Xalqın xidmətçisi” partiyası daha çox 43,8 faiz səs toplayıb. “Müxalifət platforması” 10,5 faiz “Petro Poroşenko bloku“ 8,8 faiz, Ukraynanın sabiq Baş naziri Yuliya Timoşenkonun rəhbəri olduğu “Batkivşina” partiyası isə 7,3 faiz səs qazana bilib. Digər blok və partiyalar 5 faizlik baryeri aşa bilməyib.
Qeyd edək ki, Ukraynada növbəti parlament seçkiləri oktyabr ayında keçirilməli idi. Lakin Prezident Vladimir Zelenski parlamentin buraxılması barədə fərman imzalayıb və növbədənkənar parlament seçkiləri iyulun 21-nə təyin olunub.
Emil Hüseynli
AZƏRTAC-ın xüsusi müxbiri
Kiyev