UKRAYNADA ‘SÜLH SİPƏRİ-2003’ HƏRBİ TƏLİMLƏRİ KEÇİRİLİR
İyulun 10-da Ukrayna quru qoşunlarının Qərbi operativ komandanlığının Yavorovsk ümumqoşun poliqonunda (Lvov vilayəti) briqada səviyyəsində çoxmilli sülhməramlı “Sülh sipəri-2003” adlı komanda–qərargah təlimləri başlanmışdır. AZƏRTAC-ın Ukraynadakı xüsusi müxbirinin verdiyi xəbərə görə, indiki manevrlərdə NATO-nun üzvü və tərəfdaşı olan 23 ölkədən, o cümlədən Azərbaycandan 1000-ə yaxın hərbi qulluqçu istirak edir. Təlimdə iştirak edən ölkələr Ukrayna silahlarından və hərbi texnikasından istifadə edəcəklər. Təlimlərdən məqsəd kompüter modelləşdirilməsindən istifadə etməklə sülhün müdafiəsi üzrə əməliyyatların planlaşdırılmasında və həyata keçirilməsində qüvvələrin və qərargahların ümumi fəaliyyətini hazırlamaqdır. İyulun 14-də təlimlərin təntənəli açılış mərasimi olacaqdır. Tədbirə iştirakçı ölkələrin müdafiə nazirləri, baş qərargah rəisləri, hərbi və mülki idarələrin yüksəkvəzifəli şəxsləri dəvət edilmişlər. “Sülh sipəri-2003” manevrləri iyulun 22-də başa çatacaq.
Bölmənin digər xəbərləri
