UKRAYNANIN BMT-DƏKİ NÜMAYƏNDƏ HEYƏTİ UŞAQLARIN HÜQUQLARININ MÜDAFİƏSİ SAHƏSİNDƏ BEYNƏLXALQ ƏMƏKDAŞLIĞI GÜCLƏNDİRMƏYƏ ÇAĞIRMIŞDIR

21.10.2004 [21:15]
Çap et
A⁺ A^-

AZƏRTAC-ın Ukrinformdan aldığı xəbərə görə, Nyu-Yorkda BMT Baş Məclisi 59-cu sessiyasının Üçüncü Komitəsində Ukraynanın bu qurumdakı daimi nümayəndəsi Valeri Kuçinskinin sədrliyi ilə uşaqların hüquqlarının müdafiəsi məsələləri müzakirə edilmişdir.

İclas iştirakçıları Ukraynada uşaqların hüquqları və mənafeyinin müdafiəsi sahəsində dövlət siyasəti ilə tanış olmuşlar. Onların diqqəti Çernobıl fəlakətinin uzunmüddətli nəticələrinin gənc ukraynalıların sağlamlığına təsiri məsələlərinə cəlb edilmişdir. Ukrayna nümayəndələri demişlər: ”Bizim borcumuz çernobıllı uşaqların zəruri müalicəsini, habelə yüksək səviyyəli sosial və fiziki inkişafını təmin etməkdir.

Ukrayna nümayəndələri uşaqlara qarşı zorakılıq və terrorçuluq əməllərini qətiyyətlə pisləyərək, silahlı münaqişələrin sarsıtdığı 300-dən çox iraqlı və beslanlı uşağın Ukrayna Prezidenti Leonid Kuçmanın dəvəti ilə bu ölkədə müalicə aldığı barədə komitəyə məlumat vermişlər. Onlar insan alverinin, ilk növbədə, qadın və uşaq alverinin qarşısının alınması sahəsində beynəlxalq əməkdaşlığı fəallaşdırmağın zəruriliyini vurğulamışlar.