ULU ÖNDƏR HEYDƏR ƏLİYEV AZƏRBAYCANDA MÜSTƏQİL ELEKTRİK ENERGETİKASI SİSTEMİNİN YARADICISIDIR
AZƏRTAC xəbər verir ki, mayın 9-da “Azərenerji” Açıq Səhmdar Cəmiyyətində (ASC) ümummilli liderimiz Heydər Əliyevin anadan olmasının 85-ci ildönümü ilə əlaqədar “Ulu öndər Heydər Əliyev Azərbaycanda müstəqil elektrik energetikası sisteminin yaradıcısıdır” mövzusunda konfrans keçirilmişdir.
Konfransdan əvvəl ASC-nin mərkəzi aparatının yerləşdiyi binada görkəmli siyasətçi və dövlət xadimi, müstəqil Azərbaycan dövlətinin banisi, xalqımızın ümummilli lideri Heydər Əliyevin büstünün açılışı olmuşdur.
“Azərenerji” ASC-nin prezidenti Etibar Pirverdiyev konfransda çıxış edərək, ölkədə elektroenergetikanın inkişafı istiqamətində görülən işlərdən, sahənin perspektivlərindən və yeni elektrik enerjisi obyektlərinin tikintisindən danışmışdır. E.Pirverdiyev son illər ərzində energetika sistemində həyata keçirilən islahatlar, daha müasir texnika və texnologiyaların tətbiqi, yenidənqurma işlərinin geniş vüsət alması, elektrikötürücü xətlərin təzələnməsi barədə məlumat vermişdir.
Bildirilmişdir ki, ulu öndərimiz Heydər Əliyev ölkəmizdə energetika sahəsinin inkişafına daim qayğı göstərir, həyata keçirilən islahatları nəzarətdə saxlayırdı. Bu qayğı indi də davam etdirilir. Dövlətimizin başçısı İlham Əliyevin Sərəncamı ilə təsis olunmuş Energetiklər günü hər il qeyd edilir. Peşə bayramı ərəfəsində ölkə energetiklərinin bir qrupunun dövlət mükafatlarına layiq görülməsi bu qayğının parlaq təcəssümüdür.
Ölkəmizdə elektrik enerjisi istehsalının ilbəil artdığını vurğulayan natiq demişdir ki, Azərbaycan bu gün özünü elektrik enerjisi ilə tam təchiz etmək imkanına malikdir. Daxili enerji istehsalı ölkəni tam təmin etməklə yanaşı, müəyyən həcmdə ixraca da imkan yaradır. Prezident İlham Əliyevin müvafiq Sərəncamı ilə qısa müddətdə tikilib istifadəyə verilmiş 450 meqavat gücündə modul tipli 5 stansiya Naxçıvanda, Astarada, Şəkidə, Xaçmazda, Bakıda istehlakçıların elektrik enerjisinə tələbatını ödəmək üçün yeni imkanlar açmışdır.
Diqqətə çatdırılmışdır ki, tezliklə Sumqayıtda gücü 517 meqavat olan buxar-qaz qurğusunun istismara verilməsi planlaşdırılır. Eyni zamanda, Səngəçalda gücü 300 meqavat olan modul stansiyanın inşası davam etdirilir, Füzuli rayonunda - Yuxarı Mil suvarma kanalı ərazisində 50 meqavat gücündə “Füzuli” su elektrik stansiyası tikiləcəkdir. Elektrik enerjisi istehsal edən yeni müəssisələrin yaradılması Azərbaycan iqtisadiyyatının inkişafı üçün son dərəcə əhəmiyyətlidir. Bütün bu işlər Azərbaycanı gələcəkdə etibarlı enerji təminatçısı edəcəkdir.
E.Pirverdiyev xüsusi vurğulamışdır ki, yaxın illərdə Azərbaycan elektrik enerjisi ixrac edən ölkəyə çevriləcəkdir.
Konfransda çıxış edən sənaye və energetika naziri Natiq Əliyev, Milli Məclisin deputatları Fəttah Heydərov, Aydın Mirzəzadə, Səbail Rayon İcra Hakimiyyətinin başçısı Sahib Ələkbərov və başqaları ümummilli liderimiz Heydər Əliyevin uzaqgörən iqtisadi siyasəti nəticəsində Azərbaycanın sürətli inkişaf yoluna qədəm qoyduğunu, bu strategiyanın Prezident İlham Əliyev tərəfindən uğurla davam etdirildiyini, son dövrlərdə energetiklərimizin də böyük uğurlar qazandıqlarını vurğulamışlar.
Diqqətə çatdırılmışdır ki, hazırda ölkəmiz iqtisadi potensialına görə nəinki Cənubi Qafqazda, eləcə də MDB məkanında liderdir. Dünya dövlətləri ulu öndər Heydər Əliyevin uğurlu daxili və xarici siyasəti nəticəsində yüksək tərəqqiyə nail olmuş, iqtisadi cəhətdən gündən-günə qüdrətlənən Azərbaycanla tərəfdaşlığa can atırlar.
Sonra bir qrup energetikə mükafatlar təqdim edilmişdir.
Bölmənin digər xəbərləri
