ÜMUMMİLLİ LİDERİMİZ ŞUŞANIN QƏDRİNİ BİLİR, ŞUŞALILARA QAYĞI GÖSTƏRİRDİ
Mayın 8-də Şuşa şəhərinin Ermənistanın Silahlı Qüvvələri tərəfindən işğal olunmasının 16-cı ildönümüdür. Şəhərin işğalı zamanı yüzlərlə dinc sakin həlak olmuş, yaralanmış, onlarla mülki şəxs girov götürülmüş, itkin düşmüşdür. Girov götürülənlərin bir çoxu bu günə qədər azad olunmamışdır. On altı ildir ki, 30 minə yaxın şuşalı Azərbaycanın müxtəlif bölgələrində məcburi köçkün həyatı keçirir.
Şuşa rayon mədəniyyət və turizm şöbəsinin müdiri Zahid Abbasov AZƏRTAC-ın müxbiri ilə söhbətində demişdir:
“Şuşanın dağları başı dumanlı,
Dərdindən ölməyə çoxdu gümanı...” - hər dəfə ustad Xan Şuşinskinin oxuduğu bu qədim el mahnısını eşidəndə istər-istəməz ürəyimin başı göynəyir. Xəyalən o yerlərə pərvazlanıram. Azərbaycan musiqisinin beşiyi sayılan Şuşa 1992-ci il mayın 8-də erməni qəsbkarları tərəfindən işğal olunduqdan sonra onlarla tarixi abidə, o cümlədən şəhərin əsasını qoymuş Pənahəli xanın sarayı, Cümə məscidi, Yuxarı və Aşağı Gövhər ağa məscidləri, Xurşudbanu Natəvanın evi, Molla Pənah Vaqifin məqbərəsi yağmalanıb. Üzeyir, Bülbül, Natəvan kimi tarixi şəxsiyyətlərin büstləri düşmən gülləsinə tuş gəlib. Şuşanı məşhurlaşdıran qədim memarlıq və incəsənət abidələrinin hamısını sadalamaqla qurtarmaz. Burada təkcə rəsmən qeydə alınmış 170 memarlıq abidəsi və 160 incəsənət abidəsi var idi. Şairə Xurşudbanu Natəvanın, dahi bəstəkar Üzeyir Hacıbəyovun, görkəmli müğənni Bülbülün, şair və rəssam Mir Möhsün Nəvvabın ev-muzeyləri, İbrahim xanın qəsri, Qara Böyükxanımın türbəsi, qala divarı və s.
Yeri gəlmişkən qeyd edim ki, ulu öndərimiz Heydər Əliyev hələ Azərbaycana rəhbərlik etdiyi birinci dövrdə - ötən əsrin 70-ci illərində abidələr şəhərinin qayğısına qalırdı. Məhz onun sayəsində burada kurort kompleksinin inkişaf etdirilməsi, Şuşanın qoruq şəhəri elan edilməsi haqqında qərarlar qəbul edilmişdi. Şuşa ümumittifaq kurort şəhərinə çevrilmişdi. Respublikanın rəhbəri özü də dağlar şəhərinə gəlməyi xoşlayırdı. Onun hər gəlişi mədəniyyət bayramına çevrilirdi. Bu səfərlər çərçivəsində poeziya bayramları keçirilir, şəhərdə müxtəlif yeni obyektlər açılırdı. M.P.Vaqifin əzəmətli məqbərəsi, Poeziya evi və s. həmin səfərləri xatırladan yadigarlardır. Qeyd edim ki, şöbədə həmin səfərlər zamanı çəkilmiş fotoşəkillərdən ibarət sərgi açmışıq.
Şuşa Azərbaycanın bir sıra görkəmli müğənnilərinin, musiqiçilərinin, böyük bəstəkarların və drijorların vətənidir: Cabbar Qaryağdıoğlu, Qurban Pirimov, Bülbül, Seyid Şuşinski, Xan Şuşinski, Rəşid Behbudov, Üzeyir Hacıbəyov, Niyazi, Fikrət Əmirov, Süleyman Ələsgərov əslən şuşalıdır. Tanınmış yazıçılar - Süleyman Sani Axundov, Əbdürrəhim bəy Haqverdiyev, Nəcəf bəy Vəzirov, şairə Xurşudbanu Natəvan, şair Qasim bəy Zakir, rəssam Toğrul Nərimanbəyov, heykəltəraş Cəlal Qaryağdı və başqaları bu şəhərdə doğulmuşlar. Ulu öndər onların xatirələrinin əbədiləşdirilməsi üçün çox iş görmüşdür.
Bir sözlə, ümummilli liderimiz Şuşanın qədrini bilir, şuşalılara qayğı göstərirdi. Bu gün şuşalılar həmin qayğını ulu öndərin siyasi xəttinin layiqli davamçısı Prezident İlham Əliyevdən görürlər. Böyükdən-kiçiyə hamımız inanırıq ki, Prezidentimizin yeritdiyi məqsədyönlü siyasət öz bəhrəsini verəcək, ən yaxın vaxtlarda Şuşanın başının üstündəki qara duman çəkiləcək, Qarabağ savaşında yüzlərlə şəhid vermiş doğma şəhərimiz erməni işğalından azad ediləcək, biz yenidən öz yurdumuza qayıdacağıq. Əminik ki, Şuşa köhnə yaralara məlhəm qoya-qoya yenə nəğməli-sözlü ömrünü yaşayacaq, yenə havalanacaq Xanın səsi, Qarabağın şikəstəsi...
######
