UNCTAD: Hazırda investisiyalar tibb avadanlığı və dərman istehsalına yönəldilməlidir
Bakı, 5 may, AZƏRTAC
Dünya hökumətləri xarici investisiyaları cəlb etməyə və qoruyub saxlamağa çalışır, eyni zamanda pandemiyadan ən çox ziyan çəkmiş və ya koronavirusa qarşı mübarizəyə böyük töhfə verməyə qadir olan milli şirkətlərə, kiçik və orta müəssisələrə maliyyə dəstəyi göstərirlər. Belə ki, ölkələrin bir qismi maliyyə axınlarını tibb avadanlığının və dərmanların istehsalına yönəldir, digərləri pandemiyadan ən çox ziyan çəkmiş Çin kimi ölkələrdən öz istehsalatlarını təxliyə edirlər.
BMT-nin Ticarət və İnkişaf üzrə Konfransının (UNCTAD) yeni proqnozlarına görə, 2020-2021-ci illərdə birbaşa xarici investisiya axınlarının 40 faiz azalacağı gözlənilir. AZƏRTAC BMT-nin saytına istinadla xəbər verir ki, COVID-19 koronavirusunun qlobal miqyasda yayılması gələcəyə hesablanmış beynəlxalq investisiya sazişlərinin bağlanmasına da təsir göstərir.
UNCTAD-ın Baş katibi Muhis Kutuyi bildirib: "Milli və beynəlxalq investisiya siyasəti pandemiyanın dağıdıcı iqtisadi və sosial nəticələrinin aradan qaldırılmasına kömək edə bilər və etməlidir".
O vurğulayıb ki, bu gün sərmayələr ilk növbədə tibb avadanlığı və dərman istehsalının stimullaşdırılmasına, habelə ciddi çətinliklərlə üzləşən müəssisələrə maddi yardıma yönəldilməlidir. UNCTAD-ın başçısı hesab edir ki, milli şirkətlərin beynəlxalq şirkətlər tərəfindən ələ keçirilməsi milli mənafeyə zidd olmamalıdır. Ekspertlər hesab edirlər ki, pandemiyaya qarşı mübarizəyə yönəldilmiş iqtisadi tədbirlərin təməlində təkcə şirkətlərə deyil, həm də əməkdaşlara vergi və maliyyə dəstəyi durmalıdır.
Bununla belə, ölkələr böhranı dəf etmək üçün onların sərəncamında olan müxtəlif investisiya vasitələrindən istifadə edirlər. Məsələn, İtaliya hökuməti "Alitalia" aviaşirkətinin milliləşdirilməsi ilə məşğul olub. ABŞ Administrasiyası pandemiya ilə əlaqədar ziyan çəkmiş aviasiya sahəsinin dəstəklənməsinə 25 milyard dollar ayırıb. Cənubi Koreya hökuməti gəlir itkisinə uğramamaq üçün vaksin və dərman istehsalı ilə məşğul olacaq şirkətlərə sərmayə yatırmağa hazır olduğunu bəyan edib. Niderland pandemiya şəraitində bağlanmağa məcbur olmuş biznesə yardım göstərəcək. ABŞ-da "General Motors" konserni ağciyər ventilyasiyası cihazlarının istehsalı üçün dövlət sifarişi alıb. Yaponiya öz şirkətlərinin Çindəki istehsal müəssisələrinin Yaponiyada və ya Asiyanın digər ölkələrində yerləşdirilməsi üçün 2,2 milyard dollar vəsait ayırıb.
UNCTAD-da əmindirlər ki, dövlətlər pandemiyanın doğurduğu böhrana müqavimət göstərmək üçün müxtəlif vasitələr tapa bilərlər və tapmalıdırlar.
Bölmənin digər xəbərləri
