VERGİ ÖDƏYİCİLƏRİ ÜÇÜN SEMİNAR-MÜŞAVİRƏ KEÇİRİLMİŞDİR
AZƏRTAC-ın müxbiri xəbər verir ki, Gəncədəki 12 saylı ərazi vergilər idarəsi Vergi Məcəlləsinə edilmiş dəyişikliklərin öyrənilməsi ilə əlaqədar seminar-müşavirə keçirmişdir. Şəhərin iri vergi ödəyicilərinin iştirakı ilə keçirilən tədbirdə idarənin şöbə müdiri Azər Məmmədov sahibkarların və hüquqi şəxslərin, eləcə də digər vergi ödəyicilərinin aylıq gəlirlərindən vergi tutulmasının yeni qaydaları ilə bağlı məruzə etmişdir. Sonra seminar iştirakçılarını maraqlandıran məsələlərə aydınlıq gətirilmişdir.
