VERGİLƏR NAZİRLİYİNİN ƏMƏKDAŞLARI UKRAYNA ALİ MƏKTƏBİNİN BAKIDA QANUNSUZ FƏALİYYƏT GÖSTƏRƏN FİLİALINI AŞKARA ÇIXARMIŞLAR

04.05.2006 [23:50]
Çap et
A⁺ A^-

Vergilər Nazirliyinin əməkdaşları Ukrayna Elm və Təhsil Nazirliyi nəzdindəki Reklam Universitetinin Bakıda qanunsuz fəaliyyət göstərən filialını aşkara çıxarmışlar. Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, vergi orqanları yoxlamalar zamanı müəyyənləşdirmişlər ki, universitetə 1958-ci il təvəllüdlü, Naxçıvan MR Şərur rayonunun sakini Hüseyn İsa oğlu Əlizadə başçılıq edir. 2004-cü ildən fəaliyyət göstərən filialda tələbələr 9 ixtisas üzrə əyani və qiyabi bölmələrdə pullu təhsil alırlar. İllik təhsil haqqını ödəyərkən onlara “Dostluq” elm-istehsalat mərkəzinin kassa-mədaxil orderi verilir.

Filial qanunsuz və lisenziyasız fəaliyyət göstərir, burada təxminən 35 professor və müəllim heyəti çalışır, 300-dək tələbə təhsil alır. Filialın qanunsuz fəaliyyəti vergi orqanları əməkdaşlarının müsadirə etdikləri mühasibat hesabatlarından və digər sənədlərdən də məlum olur. İlkin hesablamalardan məlum olmuşdur ki, filialın direktorunun köməkçisi Nuridə İsgəndərova son iki ildə 1 milyard manat (AZM) təhsil haqqı yığmışdır.

Ədliyyə Nazirliyində qeydiyyatdan keçmədiyinə və Təhsil Nazirliyinin lisenziyası olmadan fəaliyyət göstərdiyinə baxmayaraq, filialın müvafiq sənədləri təsdiq etmək üçün qanunsuz yolla möhürü hazırlanmışdır. Həmin möhür vurulmuş arayışlar əsasında tələbələr hərbi xidmətə çağırışdan azad edilirdilər.

Departamentin əməkdaşları filialın işinin yoxlanılmasını davam etdirirlər.