REGİONLAR
Vətən müharibəsi qazisi: “Dəmir yumruq” ətrafında birləşərək düşmənə sarsıdıcı zərbə vurduq
Tərtər, 19 iyul, Tahir Ağaməmmədov, AZƏRTAC
Döyüşə gülə-gülə gedirdik. Hamımızda böyük ruh yüksəkliyi vardı. Bir yerdə mahnı, marş, Azərbaycan Himnini oxuyurduq. Qarabağı azad etməmiş geri qayıdası deyildik. Arzumuz, niyyətimiz, məqsədimiz düşməni məhv etmək, torpaqlarımızı işğaldan azad edərək, üçrəngli bayrağımızı dalğalandırmaq idi. O da bizə qismət oldu. Bütün xalqımız “dəmir yumruq” ətrafında birləşərək düşmənə sarsıdıcı zərbə vurduq.
Bunu AZƏRTAC-ın bölgə müxbiri ilə söhbətində Tərtər rayonundan olan Vətən müharibəsi qazısı Misir Axundov deyib.
2020-ci ilin sentyabrın 27-də ərazi bütövlüyümüz uğrunda savaşa atılan Misir çətin, lakin çox şərəfli bir döyüş yolu keçib. Füzuli, Xocavənd istiqamətində gedən hərbi əməliyyatlarda iştirak edib. Hətta hərbi hissəyə onun şəhid olması xəbəri də gəlib.
Misir Axundov Vətən müharibəsi başlayan gündən döyüşlərdə iştirak edib: “Sentyabrın 27-də Füzuli istiqamətində döyüşlərə başladıq. Bir gün meşədə sığınacaqda qaldıq. Mən öndə mövqe tutaraq düşmənin hərbi hissə və ağır artilleriyalarının koordinatlarını döyüşçülərə ötürürdüm. Lakin ermənilər yerimizi aşkarlayaraq bizə atəş açdılar. Döyüş yoldaşım ayağından yaralandı, ona ilkin tibbi yardım göstərdim. Sonra onun rabitə vasitəsini götürərək irəli getdim. Müşahidə zamanı lap yaxınlığıma top mərmisi düşdü. Güclü partlayışdan özümü itirdim. Hərbi hissə komandiri bir gün sonra məni ərazidən çıxarıb. Həmin vaxt nəbzim vurmadığından şəhid olduğumu düşünüblər. Hərbi hissəyə də şəhid olmağım barədə məlumat verilib. Məni morqa yerləşdiriblər və üç gün orada qaldıqdan sonra ani refleks nəticəsində sağ olduğumu görüb təcili Bakıya göndəriblər. Mərkəzi Gömrük Hospitalında başımdan əməliyyat olunmuşam. Huşum özümə gələndə tibb işçilərinin başımın üstündə dayanaraq “qorxma, səni xilas edəcəyik, qoymarıq ki, sənə nəsə olsun”, - dediklərini eşitdim”.
Misir Axundov şəhid ailələrinə, müharibə iştirakçıları və qazilərə göstərilən dövlət dəstəyindən razılıq edib. Bildirib ki, 20 gün koma vəziyyətində qalıb. Həkimlərin və tibb işçilərinin səyi ilə həyata qayıdıb. Evə qayıdandan bir müddət sonra yenidən komaya düşüb. Valideynləri “YAŞAT” Fonduna müraciət edib. Onu ikinci dəfə əməliyyat ediblər. “YAŞAT” Fondu qazinin müalicəsi ilə yanaşı, yaşadığı evin təmirinə kömək göstərilib. Tərtər Rayon İcra Hakimiyyətinin dəstəyi ilə qazimizin anası işlə təmin edilib.
Qeyd edək ki, Vətən müharibəsi qazısı Misir Axundov Prezidentin Sərəncamları ilə “İgidliyə görə”, “Füzulinin azad olunmasına görə” və “Cəbrayılın azad olunmasına görə” medalları ilə təltif edilib.