Xaçmaz, 15 fevral, Elxan Yusifli, AZƏRTAC

2018-ci ildə Xaçmazda 1245-i daimi olmaqla, 1321 yeni iş yeri açılıb. Rayon üzrə ümumi məhsul buraxılışının həcmi 592 milyon manat, sənaye məhsulunun həcmi 62,1 milyon manat, kənd təsərrüfatı məhsullarının ümumi həcmi isə 247,5 milyon manat təşkil edib.

AZƏRTAC-ın bölgə müxbiri xəbər verir ki, bu barədə Xaçmazda 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağında məlumat verilib.

Yığıncaqdan əvvəl rayon rəhbərliyi, qonaqlar və fəallar ümummilli lider Heydər Əliyevin abidəsini ziyarət edib, önünə gül-çiçək düzüblər.

Sonra bölgədə istehsal edilən kənd təsərrüfatı və sənaye məhsullarının sərgisinə baxış olub. Qonaqlara istehsal sahələri və müəssisələri barədə məlumat verilib.

Yığıncaqda rayon icra hakimiyyətinin başçısı Şəmsəddin Xanbabayevin hesabat məruzəsi dinlənilib, müzakirələr aparılıb.

Məruzədə bildirilib ki, Prezident İlham Əliyevin 2018-ci il may ayının 4-də Xaçmaz rayonuna növbəti səfəri rayon sakinlərinin yaddaşından uzun müddət silinməyəcək. Dövlətimizin başçısı səfər çərçivəsində Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 24-48 kilometrlik hissəsini təşkil edən Xaçmaz-Xudat, 8 min nəfər əhalinin yaşadığı 8 məntəqəni birləşdirən Çarxı-Qalağan-Hacılar-Xanlıqoba-Sayad-Məmmədxanlı avtomobil yollarının, “Azərxalça” ASC-nin Xaçmaz filialının, Xaçmaz şəhərinin su təchizatı və kanalizasiya sistemlərinin istismara verilməsi mərasimində və “Azərsu” Açıq Səhmdar Cəmiyyətinin Xaçmaz idarəsinin inzibati binasının açılışında iştirak edib.

Qeyd olunub ki, ötən il Xaçmazda yaşayış məntəqələrinin qazlaşdırılması sürətlə davam etdirilib. İl ərzində rayonunun Nabran, Şimali, Günəşli, Aşağıoba, Vələmir, Xuray, Pərdiqıran, Qaracikzeyid, Aslanoba, Meşəli, Sahillər, Samurçay, Seyidli, Dalğalı, Şıxlı, Turist, Çaxçaxlı kəndləri və Hacıəlibəy kəndinin yeni salınmış hissəsi qazlaşdırılaraq, 2 min 144 abonent ilk dəfə təbii qazla təmin edilib.

Məruzədə bildirilib ki, hesabat ili rayonda təhsil sahəsində də bir sıra uğurlarla yadda qalıb. Cari tədris ilində Prezident İlham Əliyevin Sərəncamı əsasında rayonun Aşağı Ləgər, Çılğır, Gəncəli, Bayoba və Əzizli kəndlərində yeni modul tipli məktəblər quraşdırılaraq müəllim və şagirdlərin istifadəsinə verilib. Dövlətimizin başçısının Sərəncamına əsasən, rayonda daha 4 modul tipli məktəb binalarının quraşdırılması üçün vəsait ayrılıb. Bunlar Alıc Qışlaq və Qaracəlli kənd ümumi orta, Cığatay və Ərəb kənd ibtidai məktəbləridir. Bununla yanaşı, hazırda Bəybala Rəsulov adına Xaçmaz şəhər 5 nömrəli tam orta məktəb üçün yeni tədris binası inşa olunur. İkimərtəbəli məktəb binası 432 şagird yerlikdir. Yeni binanın növbəti tədris ilindən istifadəyə verilməsi nəzərdə tutulub.

Vurğulanıb ki, ötən il əsaslı şəkildə yenidən qurulan Xaçmazın Qadaşoba kəndinin yolu istifadəyə verilib. Qadaşoba kəndinə yeni avtomobil yolunun çəkilməsi ilə iki yaşayış məntəqəsində yaşayan 2 min 500-ə yaxın əhalinin Gəndob-Yalama avtomobil yoluna rahat və maneəsiz gediş-gəlişi təmin olunub.

Rayonda hesabat dövrünün ən diqqətçəkən tikintilərindən biri Çənlibel istirahət parkında ucaldılan “Ana dili müəllimi” abidəsidir. Dörd metr hündürlüyündəki abidənin arxasında kitab şəkilli simvolik pannoda ümummilli lider Heydər Əliyevin təhsillə bağlı söylədiyi məşhur sitatlar yer alıb. Abidənin ətrafında isə Azərbaycanın 38 görkəmli yazıçı və şairinin kitablarının qranitdən hazırlanmış təsvirləri yerləşdirilib.

Xaçmazdakı açıq səma altında Şəxsiyyətlər Muzeyi ərazisində Azərbaycanın dahi şəxsiyyətlərindən heykəltəraş Ömər Eldarova, tanınmış bəstəkar Ramiz Mirişliyə və general-leytenant Hüseyn Rəsulbəyova tuncdan büstlər ucaldılıb. Beləliklə, parkda dahi şəxsiyyətlərə həsr edilmiş abidələrin sayı 59-a çatdırılıb.

Prezident Administrasiyasının məsul işçisi Habil Əzənmədov, Milli Məclisin deputatı Eldəniz Səlimov və başqalarının hesabat yığıncağındakı çıxışlarında regionların sosial-iqtisadi inkişafı Dövlət Proqramının icrası çərçivəsində görülən işlərdən, aqrar sektorda aparılan islahatlardan, Azərbaycanın xarici siyasətdə qazandığı uğurlardan, ixracyönümlü məhsulların istehsalındakı müsbət dinamikadan söz açılıb, dövlətimizin başçısının qarşıya qoyduğu vəzifələr diqqətə çatdırılıb.

Sonda Prezident İlham Əliyevə müraciət qəbul olunub.