XALQ ARTİSTİ YAŞAR NURİNİN YENİ ROLLARI
Xalq artisti, Dövlət mükafatları laureatı, Akademiik Milli Dram Teatrının aktyoru Yaşar Nuri yeni rollar üzərində yaradıcılıq işlərinə başlamışdır.
AZƏRTAC-ın müxbiri ilə söhbətində Yaşar Nuri demişdir ki, ötən ilin dekabrında Moskvada Azərbaycan Estrada Teatrının və Ostankino teleqülləsinin birgə keçirdiyi estrada artistlərinin müsabiqəsində incəsənətin inkişafında göstərdiyi xidmətlərə görə nominatsiyasında xüsusi mükafata və diploma layiq görülməsi onun səhnədə, kino və teleekranda yaradıcılıq fəaliyyətinin daha da genişlənməsinə səbəb olmuşdur.
Aktyor bu yaxınlarda Xeyrəddin Qocanın “Hərənin öz payı” pyesində kommunist partiyasının rəhbəri rolunda tamaşaçılarla görüşübdür. Tezliklə teatrsevərlər Hüseyn Cavidin “Afət” əsərində Özdəmir Əli Əmirlinin “Varlı qadın” pyesində Dilənçi obrazlarında da görə biləcəklər.
Kinorejissor Vaqif Mustafayevin “Milli bomba” bədii filminin istehsalı bu günlərdə başa çatmışdır. Film fevralın axırlarında tamaşaçılara təqdim olunacaqdır. Yaşar Nuri burada Əmirqulu rolu ilə ekran həvəskarlarının görüşünə gələcəkdir.
Yaşar Nuri eyni zamanda Vaqif Mustafayevin yaxın günlərdə çəkilişinə başlanılacaq “Qızıl haşiyə” bədii filminə də dəvət alıb. Bundan başqa o, əməkdar incəsənət xadimi Ramiz Həsənoğlunun rejissorluğu ilə hazırlanan televiziya tamaşasında da baş rollardan birini ifa edəcəkdir.
Bölmənin digər xəbərləri
