XALQ RƏSSAMI HÜSEYN ƏLİYEVİN YUBİLEY SƏRGİSİ AÇILMIŞDIR
Sərgidə rəssamın müxtəlif illərdə boyakarlıq və qrafika janrında çəkdiyi 60-dan artıq əsəri nümayiş etdirilir.
Nazirlərin, Milli Məclis deputatlarının, elm, mədəniyyət və incəsənət xadimlərinin iştirak etdiyi tədbirdə mədəniyyət və turizm naziri Əbülfəs Qarayev, Rəssamlar İttifaqının katibi Salhab Məmmədov, Rəssamlıq Akademiyasının rektoru akademik Ömər Eldarov, xalq rəssamı Yusif Hüseynov və memar Rasim Əliyev xalq rəssamının yaradıcılığından danışmış, onunla bağlı xatirələrini söyləmişlər. Bildirilmişdir ki, Hüseyn Əliyev doğma təbiətin vurğunu idi və onun Azərbaycanın demək olar ki, bütün bölgələrinə səyahətləri zamanı yaratdığı əsərlər respublikamızın füsunkar gözəlliyinin poetik ifadəsidir, hər bir peyzaj bitkin bir kompozisiyadır. Xalq rəssamının dağların qoynunda məskən salmış Göygölün gün ərzində dəyişən görüntülərini əks etdirən tablolarının dolğunluğu qeyd olunmuşdur.
Çıxış edənlər xalq rəssamının Azərbaycan təbiətinə özünəməxsus baxışını, münasibətini, əsərlərində milli koloritin qabarıqlığını diqqətə çatdırmış, böyüməkdə olan gənc nəslin tərbiyəsində, onların Vətənə sevgi və qayğı ilə yanaşmasında bu əsərlərin əhəmiyyətini vurğulamışlar.
Tamaşaçılar tərəfindən maraqla qarşılanan sərgi aprelin 27-dək davam edəcəkdir.
Bölmənin digər xəbərləri
