Vətənimizin hüdudlarından kənarda yaşayan milyonlarla soydaşımız cənab İlham Əliyevin Baş nazir vəzifəsinə təyin olunmasını böyük məmnunluq və razılıq hissi ilə qarşılamışlar.

Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a daxil olan məlumatda deyilir ki, Azərbaycanın taleyinə biganə qalmayan, ürəkləri Vətən eşqi ilə döyünən soydaşlarımız Komitə ilə əlaqə saxlayaraq öz sevinclərini bölüşür, yeni Baş naziri təbrik edir, onu müstəqil Azərbaycan dövlətçiliyinin qurucusu Prezident Heydər Əliyevin layiqli davamçısı kimi qəbul etdiklərini bildirirlər.

Xaricdə yaşayan soydaşlarımızdan Komitəyə daxil olmuş bəyanatda deyilir: “Azərbaycan həqiqətləri, ölkəmizdə aparılan geniş quruculuq işləri, dövlətçiliyimizin möhkəmləndirilməsi kənardan daha yaxşı görünür. Cənab Prezidentin ən yaxın silahdaşı kimi İlham Əliyev ölkəmizin maraqlarına cavab verən beynəlxalq müqavilələrin bağlanmasında, əzəmətli iqtisadi layihələrin həyata keçirilməsində müstəsna xidmətlər göstərmişdir. Beynəlxalq təşkilatlarda Azərbaycan maraqlarının təmin edilməsi, uğurlu nəticələrin əldə edilməsi də İlham Əliyevin adı ilə bağlıdır.

Azərbaycanın neft strategiyasının həyata keçirilməsində Dövlət Neft Şirkətinin birinci vitse-prezidenti kimi İlham Əliyev bir çox uğurlara imza atmışdır. Milli Olimpiya Komitəsinin Prezidenti vəzifəsində yorulmaz fəaliyyəti nəticəsində cənab İlham Əliyev Azərbaycan gəncliyinin dərin rəğbətini qazanmışdır. Böyüməkdə olan gənc nəsil gələcəkdə yeni, firavan Azərbaycanın başçısı kimi İlham Əliyevi görür və sabaha inamla baxır.

Cənab İlham Əliyev yüksək bacarığını, böyük intellektual potensialını ona tapşırılan bütün sahələrdə nümayiş etdirmişdir. İlham Əliyev nəinki ölkə daxilində, ölkəmizin hüdudlarından kənarda da tanınmış siyasətçidir. Onun yorulmaz fəaliyyəti, qətiyyəti, Azərbaycan diasporunun da qürur mənbəyinə çevrilmişdir. Biz, xarici ölkələrdə yaşayan azərbaycanlılar doğma Vətənimizdə bərqərar olmuş sabitliyin, iqtisadi yüksəlişin, aparılan siyasi xəttin davamlı olmasını istəyir, hər sahədə Azərbaycana xidmət göstərməyə, onun yeni Baş nazirinə kömək etməyə hazır olduğumuzu bəyan edirik.

Son zamanlar bəzi daxili və xarici qüvvələr Azərbaycan dövlətinə, onun başçısına çirkin üsullarla qara yaxır, mənəvi əxlaqsızlıqlarını nümayiş etdirirlər. Dünya azərbaycanlıları belə çirkin usullarla mübarizə aparan qüvvələrə qətiyyətlə “Yox!” deyirlər.

Biz əminik ki, dünya azərbaycanlıları ilə iş, soydaşlarımızın əqidə və əməl birliyinə istiqamətlənmiş fəaliyyət Baş nazir cənab İlham Əliyev tərəfindən davam etdiriləcək, Azərbaycanın mənafeyi naminə dünya azərbaycanlıları ilə əməkdaşlıq daha da güclənəcəkdir”.

Moldova və Belorusdan, Ukrayna Azərbaycanlıları Konqresindən, Dünya Azərbaycanlıları Konqresindən, İsrail-Azərbaycan dostluq cəmiyyətindən, Türkiyədəki çoxsaylı Azərbaycan diasporu adından, “Azəri” Latviya-Azərbaycan cəmiyyətindən, Hollandiyada yaşayan azərbaycanlılar adından, Macar-Azərbaycan dostluq cəmiyyətindən, Belçika-Azərbaycan Evindən, Azərbaycan-İsveç Komitəsindən, Bolqarıstandakı Azərbaycan icması adından, Almaniyadakı “Azəri” cəmiyyətindən, Rusiya Federasiyasının müxtəlif şəhərlərindən və bir çox başqa yerlərdən Komitəyə daxil olan teleqramlarda da soydaşlarımız İlham Əliyevi təbrik edir, yeni vəzifəsində ona böyük uğurlar arzulayırlar