XƏTAİ RAYONUNDA ULU ÖNDƏR HEYDƏR ƏLİYEVİN DOĞUM GÜNÜ ŞƏRƏFİNƏ GÜL BAYRAMI KEÇİRİLMİŞDİR
AZƏRTAC xəbər verir ki, Xətai rayonunda da bu günlər əsl bayram əhval-ruhiyyəsi hökm sürür. Günəşli may günündə musiqi sədaları rayonun hər bir sakinini Heydər Əliyev adına parkda keçirilən gül bayramına səsləyirdi. Park bayram libasına bürünmüşdü. Müxtəlif gül kompozisiyalarından, pannolardan, şəkil və plakatlardan, əl işlərindən ibarət sərgilər gül bayramına gələnləri dönə-dönə ayaq saxlamağa vadar edirdi. Rayonun idarə və təşkilatlarının, ümumtəhsil məktəbləri kollektivlərinin, uşaq tərbiyə müəssisələrinin nümayəndələrinin aylardan bəri hazırladıqları əl işləri burada təqdim edilmişdir.
Gül bayramı ümummilli liderimiz Heydər Əliyevin 85 illiyinə həsr olunduğu üçün nümayiş etdirilən hər bir gül çələngində, əl işlərinin mövzu və kompozisiyasında sevimli rəhbərə məhəbbət, onun xatirəsinə ehtiram və səmimiyyət hissləri qabarıq gözə çarpırdı. Hər bir çalarda, ilmədə, naxışda bir istək, bir arzu, bir məna formalaşmışdır — ulu öndərə sonsuz qayğı və ehtiram!
Ümummilli liderimiz Heydər Əliyevin və görkəmli oftalmoloq alim, akademik Zərifə xanım Əliyevanın portretlərinə güllərdən toxunmuş xalçanın qarşısında xeyli tamaşaçı toplaşmışdı.
Tamaşaçı seyr edir, onu maraqlandıran mövzularda suallar verirdi, qiymətləndirmək işi isə münsiflər heyətinin üzərinə düşürdü...
Yaradıcı yanaşma, ən yaxşı kompozisiya, ən yaxşı gül rəsmi, ən yaxşı tətbiqi sənət nümunəsi, ən gözəl gül geyimi, gül mövzusunda ən yaxşı müəllif fotosu, asfalt üzərində ən yaxşı gül rəsmi nominasiyalarının qaliblərinə diplom və pul mükafatı veriləcəkdir.
Gül bayramı incəsənət ustalarının maraqlı konserti və atəşfəşanlıqla başa çatmışdır.
######
