XIRDALAN QƏSƏBƏSİNDƏ ORTA MƏKTƏB BİNASININ TƏMƏLİ QOYULMUŞDUR
Sentyabrın 12-də Abşeron rayonunun Xırdalan qəsəbəsində 1296 yerlik orta məktəb binasının təməlinin qoyulmasına həsr olunmuş mərasim keçirilmişdir.
Mərasimə toplaşan sakinlər, təhsil işçiləri Prezident İlham Əliyevi alqışlarla qarşıladılar.
Dövlətimizin başçısı binanın layihəsi ilə tanış oldu. Prezidentə məlumat verildi ki, Təhsil Nazirliyinin sifarişi ilə “Azkommunallayihə” İnstitutu tərəfindən hazırlanmış layihə əsasında tikiləcək və gələn ilin sentyabrında istifadəyə veriləcək orta məktəbdə 70-dən çox sinif otağı, idman, konfrans salonları, kompyuter otağı və yardımçı otaqlar, voleybol meydançası, ayrıca istilik sistemi olacaqdır. Qəsəbədəki 2 nömrəli orta məktəbin ərazisində müasir standartlara uyğun tikiləcək üçmərtəbəli məktəb Azərbaycanın ən nümunəvi təhsil ocaqlarından biri olacaqdır. İnşaat işlərini “Ulubəy-İnşaat” Məhdud Məsuliyyətli Cəmiyyət yerinə yetirəcəkdir.
İndiyədək 2 nömrəli orta məktəbdə 4500 şagird üç növbədə təhsil alırdı. Bu ağır vəziyyəti nəzərə alaraq, yeni məktəb binasının tikintisinə başlanır. Növbəti ildə 2 nömrəli məktəbin indiki binası da təmirə dayandırılacaqdır.
Prezident İlham Əliyev binanın təməlinin qoyulduğunu bildirən gilizi bünövrəyə atdı və ilk beton qarışığını tökdü.
Dövlətimizin başçısı təhsil işçilərini təbrik etdi, gələn ilin sentyabrında məktəbin açılışı olacağını bildirdi.
2 nömrəli orta məktəbin ədəbiyyat müəllimi ELMİRA YAQUBOVA təhsil işçiləri adından Prezidentə dərin minnətdarlığını bildirərək dedi:
- Çox hörmətli cənab Prezident, Abşeron rayonunun Xırdalan qəsəbəsindəki 2 nömrəli orta məktəbdə Sizi salamlamaq bizim hamımız üçün olduqca xoşdur. Azərbaycanımızın daha da inkişaf etməsi, ulu öndərimiz, qüdrətli şəxsiyyət Heydər Əliyev ideyalarının dönmədən həyata keçirilməsi naminə Sizə böyük uğurlar və möhkəm cansağlığı arzulayıram.
Cənab Prezident, bu gün bir daha qürur hissi ilə deyirik ki, regionların sosial-iqtisadi inkişafı haqqında Dövlət proqramı qəbul edildikdən sonra bütövlükdə respublikamız geniş abadlıq, tikinti meydanına çevrilmişdir. Biz abşeronlular da fəxr edirik ki, son bir ildə rayonumuzda çox işlər görülüb və görülməkdədir.
Cənab Prezident, elmə, təhsilə, xüsusilə məktəb tikintisinə hədsiz diqqət yetirdiyinizə görə Sizə dərin minnətdarlığımızı bildiririk. Elə təkcə bizim rayonumuzda 10 məktəb binası inşa edilir. Bunlardan 6-sı Təhsil Nazirliyi, 3-ü Heydər Əliyev Fondu tərəfindən, 1-i isə Yaponiyanın ölkəmizdəki səfirliyinin maliyyə dəstəyi ilə tikilir. Yeni məktəb binası tikmək kimi müqəddəs bir işdə Heydər Əliyev Fondunun prezidenti, Milli Məclisin deputatı Mehriban xanımın hamıya örnək ola biləcək fəaliyyətini yüksək qiymətləndirir, ona ürəkdən gələn ən səmimi, xoş arzularımızı çatdırırıq.
Cənab Prezident, bu gün bizim üçün, həqiqətən, mübarək bir gündür. Bir qədər öncə ümummilli liderimiz, xalqımızın fəxri, müstəqil Azərbaycanımızın memarı, dahi Heydər Əliyevin qəsəbəmizdə monumental abidə kompleksi açılmışdır. Bu mərasim dahi Heydər Əliyevə ümumxalq məhəbbətinin bir daha nümayişinə çevrilmiş, Sizin ətrafınızda hamımızın necə sıx birləşdiyini açıq şəkildə göstərmişdir. Biz çox sevinirik ki, Sizinlə birgə yeni məktəb binasının təməlinin qoyulması mərasimində iştirak edirik. İnanırıq ki, bu məktəbdə təhsil alacaq şagirdlər, işləyəcək müəllimlər Azərbaycanımızın gələcəyi naminə, azərbaycanlı adına layiq olmaq üçün var qüvvələrini sərf edəcəklər.
Çox hörmətli cənab Prezident, həmişə Sizinlə görüşmək arzusunda idim. Ulu Tanrıma şükürlər olsun ki, Sizinlə görüşdüm. Sizə dərin minnətdarlığımı bildirmək istəyirəm ki, 2005-ci tədris ilində təhsil sahəsindəki uğurlarıma görə məni “Tərəqqi” medalı ilə təltif etmisiniz. Bu təltifə görə ailəm və öz adımdan Sizə dərin təşəkkür edirəm. Uca Allahdan arzu edirəm ki, hələ çox-çox illər belə vüqarla, hünərlə Azərbaycanı addım-addım gəzəsiniz.
Prezident İLHAM ƏLİYEV xoş və səmimi sözlərə görə təşəkkür edərək dedi:
- Bir ildən sonra gözəl məktəb tikiləcək və uşaqlar yaxşı şəraitdə oxuyacaqlar. Mənə dedilər ki, bu məktəbdə 4500 şagird təhsil alır. Bu, çox çətindir, həm uşaqlar üçün, həm də müəllimlər üçün əziyyətdir. Müəllim Azərbaycanda ən hörmətli insandır. Böyük hörmətə malik müəllimin həm şəraiti yaxşı olmalıdır, həm də uşaqlar yaxşı oxumalıdır. Bütövlükdə indi Azərbaycanda hər şey çox sürətlə inkişaf edir. Bütün sahələrdə ən müasir, ən yaxşı şərait olmalıdır. İlk növbədə də məktəblərdə. 2008-ci ilə qədər Azərbaycanda məktəb tikintisi məsələləri bütünlüklə həll olunmalıdır. Harada lazımsa, təmir olunacaq, harada lazımsa, tikiləcəkdir. Yəni pis vəziyyətdə olan məktəb binaları qalmamalıdır.
Sizə bir daha uğurlar arzulayıram. Sağ olun.
Bölmənin digər xəbərləri
