Xocalı faciəsi Azərbaycan xalqına qarşı soyqırımı siyasətinin tərkib hissəsidir
Şəki, 25 fevral, Mustafa Dadaşov, AZƏRTAC
Xalqımızın tarixinə qanla yazılan Xocalı faciəsinin iyirmi beşinci ildönümü şimal-qərb bölgəsi rayonlarında da silsilə tədbirlərlə qeyd olunur.
AZƏRTAC xəbər verir ki, faciənin ildönümü ilə əlaqədar Şəkidə keçirilən anım tədbirinin iştirakçıları əvvəlcə Dövlət Dram Teatrının foyesində məktəblilərin Xocalı mövzusunda çəkdikləri rəsm əsərlərindən ibarət sərgiyə baxıblar.
Şəhər rəhbərliyinin, rayonda məskunlaşmış Xocalıdan olan məcburi köçkünlərin, ictimaiyyət nümayəndələrinin iştirak etdiyi tədbirdə Xocalı qətliamının Ermənistanın Dağlıq Qarabağı işğal etmək məqsədi ilə başladığı işğalçılıq müharibəsinin gedişində azərbaycanlılara qarşı törətdikləri soyqırımı cinayətinin ən dəhşətlisi olduğu xüsusi vurğulanıb. Bildirilib ki, erməni millətçilərinin öz havadarlarının köməyi ilə 1992-ci il fevralın 25-dən 26-na keçən gecə Xocalıda həyata keçirdikləri bu cinayət 613 nəfərin, o cümlədən 106 qadının, 63 uşağın, 70 qocanın həyatına son qoyub, 487 nəfər ağır yaralanıb, 1275 nəfər girov götürülüb, 197 nəfər isə itkin düşüb. Soyqırımı nəticəsində şəhərin mülki əhalisi misli görünməmiş qəddarlıqla qətlə yetirilib, 8 ailə tamamilə məhv edilib.
Tədbirdə rayonun “Yeni Çələbixan” məcburi köçkün qəsəbəsində fəaliyyət göstərən Xocalı şəhər 3 nömrəli tam orta məktəbin direktoru Eldəniz Məhərrəmov çıxış edərək, faciənin başvermə səbəbləri, ermənilərin dinc əhaliyə qarşı törətdikləri vəhşiliklər barədə danışıb.
Anım tədbirinin sonunda ədəbi-bədii kompozisiya nümayiş etdirilib.
Rayonda məskunlaşmış Xocalıdan olan məcburi köçkün ailələrinə maddi yardım göstərilib.
X X X
Bəşər tarixinin ən qanlı cinayətlərindən olan Xocalı faciəsinin iyirmi beşinci ildönümü ilə əlaqədar fevralın 25-də Zaqatala şəhərində keçirilən ümumrayon tədbirinin iştirakçıları əvvəlcə soyqırımı qurbanlarının xatirəsinə ucaldılmış abidənin önünə gül dəstələri düzüb, faciə qurbanlarının xatirəsini ehtiramla yad ediblər.
AZƏRTAC xəbər verir ki, mərasimdə rayon icra hakimiyyəti başçısının birinci müavini Tofiq Əhmədov çıxış edərək, Xocalı faciəsinin erməni millətçilərinin Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsi olduğunu bildirib, faciənin səbəbləri və acı nəticələri barədə danışıb. Qeyd olunub ki, bu hadisələrin qabaqcadan düşünülmüş qaydada, milli əlamətinə görə insanların tamamilə və ya qismən məhv edilməsi niyyəti ilə törədilməsi beynəlxalq hüquqa əsasən, soyqırımı olduğunu sübut edir. Erməni millətçilərinin törətdiyi bu vəhşilik və vandalizm aktı bəşəriyyətin genosid kimi tanıdığı Xolokost, Xatın faciələri ilə eyni səviyyədə qiymətləndirilir.
Bildirilib ki, ərazilərimizin 20 faizinin düşmən tapdağı altında olduğu, bir milyondan çox soydaşımızın qaçqın və məcburi köçkün həyatı yaşadığı bir dövrdə keçmişi tanımaq və tanıtdırmaq ölkəmizin bu günü və gələcəyi üçün böyük əhəmiyyət daşıyır. Azərbaycan xalqına qarşı törədilən vəhşiliklərlə bağlı tarixi hadisələrin ölkə daxilində və ölkədən kənarda tanıdılması məqsədi ilə görülən işlər dövlətimizin həyata keçirdiyi siyasətin mühüm tərkib hissəsidir. Erməni millətçilərinin törətdikləri Xocalı faciəsi artıq dünyanın bir sıra ölkələrində soyqırımı aktı kimi tanınır.
Tədbirdə soyqırımının acı nəticələrinin dünya ictimaiyyətinə çatdırılmasında, Xocalı faciəsinə hüquqi-siyasi qiymət verilməsində ümummilli lider Heydər Əliyevin tarixi xidmətləri önə çəkilib, hazırda bu istiqamətdə ölkə rəhbərliyi tərəfindən məqsədyönlü tədbirlərin həyata keçirildiyi vurğulanıb.
Həmin gün rayonda məskunlaşmış Xocalıdan olan məcburi köçkün ailələrinə ərzaq yardımı göstərilib.
Bölmənin digər xəbərləri
