Xocalı faciəsi bütün insanlığa, bəşəriyyətə qarşı törədilən ən ağır, ən qatı cinayətdir
Qəbələ, 26 fevral, Şahnəzər Bəşirov, AZƏRTAC
Xocalı soyqırımının 25-ci ildönümü ilə əlaqədar Qəbələ Mədəniyyət Mərkəzində anım mərasimi təşkil edilib.
Tədbirdə rayon ictimaiyyətinin nümayəndələri, Qəbələdə məskunlaşan xocalılı məcburi köçkünlər, müharibə veteranları, şəhid ailələrinin üzvləri və gənclər iştirak ediblər.
Mərasim iştirakçıları əvvəlcə mərkəzin foyesində Xocalı faciəsinin dəhşətlərini əks etdirən rəsm sərgisinə baxıblar.
Daha sonra keçirilən mərasimdə Xocalı soyqırımı qurbanlarının və Azərbaycan torpaqlarının bütövlüyü uğrunda həlak olan insanların xatirəsi bir dəqiqəlik sükutla yad edilib.
Qəbələ rayon icra hakimiyyətinin başçısı Səbuhi Abdullayev çıxış edərək diqqətə çatdırıb ki, bu gün Vətənimizdə, ölkəmizdə kədərli bir gündür. Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olub. Xalqımız 200 il ərzində erməni millətçi-şovinistlərinin davamlı olaraq etnik təmizləmə, soyqırımı siyasətinə məruz qalıb. Soydaşlarımız zaman-zaman doğma torpaqlarından qovulub, qaçqına, məcburi köçkünə çevrilib və bütün bunlar ermənilər tərəfindən törədilən kütləvi qırğınlarla müşayiət olunub. Qeyd edilib ki, 1988-ci ildən Dağlıq Qarabağ ətrafında baş verən hadisələr Azərbaycanın tarixi ərazisində kəndlərin, şəhərlərin dağıdılması, on minlərlə günahsız insanın həlak olması, yüz minlərlə vətəndaşımızın öz ata-baba torpaqlarından didərgin düşməsi ilə nəticələnib. Beynəlxalq hüququn bütün normalarına zidd olaraq Ermənistanın Dağlıq Qarabağı özünə birləşdirmək istəyi XX əsrin ən böyük faciələrindən biri olan Xocalı soyqırımının törədilməsinə gətirib çıxarıb. 1992-ci il fevralın 25-dən 26-na keçən gecə baş verən Xocalı faciəsi təkcə Azərbaycan xalqına deyil, bütün insanlığa, bəşəriyyətə qarşı törədilən ən ağır, ən qatı cinayətlərdən biridir.
Tədbirdə çıxış edən Xocalı sakinləri, idarə və təşkilat rəhbərləri bu cinayətin cəzasız qalmaması, Ermənistanın hərbi-siyasi təcavüzünün dünya ictimaiyyəti tərəfindən ittiham edilməsi üçün daha təsirli tədbirlərin görülməsini istəyiblər. Qeyd edilib ki, beynəlxalq təşkilatlar, dünya dövlətlərinin parlamentləri Ermənistanın Azərbaycan torpaqlarında törətdiyi hərbi cinayətə - Xocalı faciəsinə əsl soyqırımı kimi beynəlxalq siyasi-hüquqi qiymət verməlidir.
X X X
Mingəçevirdə də Xocalı soyqırımı qurbanlarının xatirəsi ehtiramla yad edilib. Şəhər sakinləri əvvəlcə Şəhidlər xiyabanındakı Xocalı soyqırımı abidəsini ziyarət edərək önünə gül dəstələri düzüblər.
Daha sonra şəhər icra hakimiyyətində keçirilən toplantıda Vətənimizin müdafiəsi uğrunda canından keçən şəhidlərimizin xatirəsi bir dəqiqəlik sükutla yad edilib. Tədbirdə çıxış edən Mingəçevir şəhər icra hakimiyyətinin başçısı Niyazi Bayramov bildirib ki, 25 il öncə törədilən Xocalı dəhşətləri xalqımızın qan yaddaşında silinməz izlər qoyub.
Xocalı İcra Hakimiyyətinin nümayəndəsi Göyüş Həsənov təsadüf nəticəsində sağ qaldıqlarını bildirərək deyib: “O anları heç vaxt unuda bilməyəcəyik. İnsan ölə bilər, amma torpaq gedə bilməz. Bütün xocalılılar inanırlar ki, Prezident İlham Əliyevin rəhbərliyi ilə Cocuq Mərcanlı kəndindən başlayan böyük qayıdış işğal olunmuş digər torpaqlarımızın da azad olunması və abadlaşdırılması ilə başa çatacaqdır”.
Tədbirdə Xocalıdan olan şəhid ailələri də çıxış etdilər. Natiqlər soyqırımı zamanı baş verən dəhşətli anları yada salıblar, erməni quldurlarının vəhşiliklərindən danışıblar.
Xocalı faciəsinin 25-ci ildönümü Mingəçevir Turizm Kollecində də silsilə tədbirlərlə anılıb.
Daha sonra Xocalı hadisələrindən bəhs edən filmə nümayiş etdirilib. Kollecin müəllimlərinin “Xocalı - əsrin son müsəlman soyqırımı”, “Xocalı faciəsi XX əsrin soyqırımıdır”, “Xocalı faciəsi Ermənistanın Azərbaycan xalqına qarşı apardığı məqsədyönlü soyqırımı siyasətidir” mövzularında məruzələri dinlənilib.
Bölmənin digər xəbərləri
