QAN YADDAŞI
Xocalı faciəsi həddindən artıq böyük dərddir
Bakı, 26 fevral, AZƏRTAC
Bu gün biz hamımız Xocalı yürüşünə gəlmişik. Bu faciə xalqımızın yaddaşına əbədi həkk olunub. Arzum budur ki, gələn il bu yürüş Xocalıya qədər davam etsin.
Bu sözləri Xocalı soyqırımının 25-ci ildönümü ilə əlaqədar fevralın 26-da Bakıda keçirilən ümumxalq yürüşündə iştirak edən Xətai Rayon Gigiyena və Epidemiologiya Mərkəzinin əməkdaşı Mətanət Yusubova söyləyib.
M.Yusubova bildirib: “Mən də məcburi köçkünəm və bu səbəbdən o günü yaşayanları çox gözəl başa düşürəm. Bu insanların keçirdiyi hisslər mənə tanışdır. Həqiqətən də Xocalı faciəsi çox dəhşətli bir mənzərə, həddindən artıq böyük dərddir. O günü yaşamış insanlara, o vəhşiliyə şahid olanlara səbirdən başqa heç bir şey arzulaya bilmirəm. Bir tək onu deyə bilərəm ki, biz Azərbaycan xalqı olaraq yalnız sülh arzulayırıq. Dünyanın heç bir yerində uşaqlar ölməsin, analar ağlamasın”.