Xocalı faciəsi qurbanlarının xatirəsi Qarabağ bölgəsində dərin hüznlə yad edilir
Ağdam, 25 fevral, Tahir Ağaməmmədov, AZƏRTAC
XX əsrin ən dəhşətli hadisələrindən olan Xocalı faciəsinin 25-ci ildönümü Qarabağ bölgəsində dərin hüznlə yad edilir.
AZƏRTAC xəbər verir ki, faciənin ildönümü ilə bağlı müxtəlif tədbirlər, sərgilər, anım mərasimləri keçirilir, soyqırımı qurbanlarının xatirəsi ehtiramla anılır.
Ağdam rayon rəhbərliyi, ziyalılar, ictimaiyyət nümayəndələri, Qarabağ müharibəsi veteranları, gənclər və ağsaqqallar əvvəlcə rayonun girişindəki Şəhidlər abidə-kompleksi önünə tər qərənfillər düzərək, Xocalıda həlak olanların ruhuna dualar oxuyublar.
Quzanlı qəsəbəsindəki Ağdam Dövlət Dram Teatrında davam edən tədbir Xocalı faciəsi zamanı şəhid olmuş soydaşlarımızın xatirəsinin bir dəqiqəlik sükutla yad edilməsi ilə başlanıb.
Tədbirdə çıxış edənlər erməni silahlı qüvvələri tərəfindən Xocalı şəhərində törədilən qırğının acı nəticələrindən danışıblar. Bildirilib ki, həmin gün Xocalıda 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirilib. 8 ailə tamamilə məhv edilib, 25 uşaq hər iki valideynini, 130 uşaq isə valideynlərdən birini itirib, 487 nəfər, o cümlədən 76 uşaq ağır yaralanıb, 1275 nəfər girov götürülüb, 197 nəfər itkin düşüb.
Mərasimdə çıxış edən Xocalı sakinləri və xocalılıların xilas edilməsində iştirak etmiş keçmiş döyüşçülər erməni silahlılarının törətdikləri qanlı cinayətlərdən, günahsız insanların başına gətirilən müsibətlərdən bəhs ediblər.
Tədbir Ağdam Dövlət Dram Teatrının hazırladığı ədəbi-bədii kompozisiya ilə başa çatıb.
X X X
Xocalı faciəsinin 25-ci ildönümü münasibətilə laçınlı məcburi köçkünlərin məskunlaşdıqları Ağcabədi rayonunun Taxtakörpü qəsəbəsindəki Şəhidlərin xatirə kompleksi qarşısında ümumrayon anım mərasimi keçirilib. Laçın rayon rəhbərliyi, ictimaiyyət nümayəndələri, əmək kollektivləri, gənclər, Qarabağ müharibəsi veteranları abidə önünə tər çiçəklər düzüb, şəhidlərin ruhuna dualar oxunub.
Mərasimdə ermənilər tərəfindən həyata keçirilən Xocalı soyqırımının insanlığa qarşı qəddar cinayət olduğu bildirilib. Faciə şahidləri o qanlı gecəni xatırlayaraq, həmin hadisənin heç zaman yaddaşlardan silinməyəcəyini deyiblər.
Xocalı faciəsinin 25-ci ildönümü ilə bağlı Laçın Rayon İcra Hakimiyyətində tərtib edilmiş tədbirlər planına uyğun olaraq idarə, müəssisə və təşkilatlarda, ümumtəhsil məktəblərində müxtəlif tədbirlər keçirilib, sənədli və bədii filmlər nümayiş edilib.
X X X
Ağcabədi Pedaqoji Kollecində keçirilən tədbirin iştirakçıları əvvəlcə Xocalı faciəsi qurbanlarının xatirəsini bir dəqiqəlik sükutla yad ediblər.
AZƏRTAC xəbər verir ki, kollecin direktor müavini Rövşən Bayramov, Heydər Əliyev Mərkəzinin direktoru Məhsəti Ağayeva, Mədəniyyət Mərkəzinin direktoru Məzahir Mehdiyev və başqaları çıxış edərək, erməni silahlı qüvvələri tərəfindən Xocalı şəhərində törədilən qırğından, dinc əhaliyə amansız divan tutulmasından danışıblar. Bildirilib ki, Xocalı soyqırımı Ermənistanın Azərbaycana qarşı hərbi təcavüzünün əsl mahiyyətini və erməni vəhşiliyini bütün çılpaqlığı ilə üzə çıxardı. Bu dəhşətli faciə xalqımızın Qarabağ müharibəsində aldığı ən böyük yaradır.
Çıxışlardan sonra Heydər Əliyev Mərkəzində fəaliyyət göstərən “Həvəskar aktyorluq və bədii qiraət” kursunun üzvlərinin iştirakı ilə “Bu dağların qoynunda yaşıl bir kənd var idi” adlı ədəbi-bədii kompozisiya göstərilib.
X X X
XX əsrin ən dəhşətli faciələrindən olan Xocalı soyqırımı qurbanlarının xatirəsi respublikamızın hər yerində olduğu kimi, Beyləqan rayonunda da dərin hüznlə anılıb.
AZƏRTAC xəbər verir ki, Heydər Əliyev Mərkəzində keçirilən “Əsrin ən böyük faciəsi” adlı ümumrayon tədbirinin iştirakçıları əvvəlcə Xocalı faciəsinə həsr edilən rəsm sərgisinə baxıblar.
Çıxış edənlər 1992-ci il fevralın 25-dən 26-na keçən gecə erməni hərbi hissələrinin keçmiş sovet ordusunun Xankəndidəki 366-cı motoatıcı alayının hərbi texnikasının köməyi ilə Xocalıda dinc, günahsız insanlara qarşı törədikləri kütləvi qırğın, ağır cinayət əməllərindən danışıblar.
Faciənin ildönümü ilə əlaqədar 1 nömrəli orta məktəbdə və Gənclər Mərkəzində “Xocalıya ədalət!” adlı ədəbi-bədii kompozisiya nümayiş olunub.
Bölmənin digər xəbərləri
