Xocalı soyqırımı bütövlükdə insanlıq əleyhinə törədilmiş cinayətdir
Bakı, 27 fevral (AZƏRTAC). Azərbaycan Milli Elmlər Akademiyası Genetik Ehtiyatlar İnstitutunda Xocalı faciəsinin 22-ci ildönümünə həsr olunmuş anım tədbiri keçirilmişdir.
AZƏRTAC xəbər verir ki, institutun elmi işlər üzrə direktor müavini, professor Naib Əminov çıxış edərək demişdir ki, XX əsrin ən böyük faciəsi olan Xocalı soyqırımı təkcə Azərbaycan xalqına qarşı deyil, bütövlükdə insanlıq əleyhinə törədilmiş bir cinayətdir. Erməni silahlı birləşmələri 1992-ci il fevralın 25-dən 26-na keçən gecə keçmiş Sovet ordusunun 366-cı motoatıcı alayının hərbçilərinin və döyüş texnikasının köməyi ilə Azərbaycanın Xocalı şəhərini yerlə-yeksan etmişlər. Bir neçə saat ərzində Xocalıda 613 nəfər günahsız insan qəddarcasına qətlə yetirilmiş, 487 nəfərə ağır xəsarətlər yetirilmiş, girov götürülmüş 1275 sakin ağlasığmaz zülmə, təhqirlərə məruz qalmışdır.
İnstitutun böyük elmi işçisi, əslən Xocalıdan olan və faciənin canlı şahidi Əkbər Kərimov həmin gecə baş vermiş hadisələrdən danışmış, bəzi qohumlarının ermənilər tərəfindən amansızcasına qətlə yetirildiyini bildirmişdir.
İnstitutun bitki fiziologiyası şöbəsinin müdiri, professor Ramiz Əliyev və həmkarlar təşkilatının sədri, biologiya üzrə fəlsəfə doktoru Hamlet Sadıqov da soyqırımın acı xatirəsindən bəhs etmişlər.
Tədbirdə Xocalı soyqırımını əks etdirən videoçarx nümayiş olunmuşdur.
Bölmənin digər xəbərləri
