Xocalı soyqırımı XX əsr dünya tarixinin ən dəhşətli səhifələrindən biridir
Bakı, 26 fevral (AZƏRTAC). Almaniyanın Noymünster şəhərində Xocalı soyqırımının 22-ci ildönümünə həsr olunmuş tədbir keçirilmişdir.
Diasporla İş üzrə Dövlət Komitəsindən AZƏRTAC-a bildirilmişdir ki, Almaniya Azərbaycanlı Gənclər Birliyinin, Alman-Azərbaycan Mədəni Əlaqələr Cəmiyyətinin, Azərbaycan Diasporunun Almaniyadakı Mərkəzi Şurasının rəhbərləri Elnur Rixter, Azad Əzizov və Tengis Sade Baron zu Romkerhallın təşkilatçılığı ilə keçirilən tədbirdə faciə qurbanlarının xatirəsi bir dəqiqəlik sükutla yad edilmişdir.
Alman-Azərbaycan Mədəni Əlaqələr Cəmiyyətinin rəhbəri Azad Əzizov və Cəmiyyətin Noymünster şəhərindəki nümayəndəsi Elmira Məmmədova erməni təcavüzkarlarının Xocalıda törətdikləri qətliam barədə danışmışlar.
Tengis Sade Baron zu Romkerhall qeyd etmişdir ki, Xocalı soyqırımı XX əsr dünya tarixinin ən dəhşətli səhifələrindən biridir və erməni hərbi qüvvələri tərəfindən həyata keçirilmiş etnik təmizləmə siyasətinin əyani göstəricidir.
Elnur Rixter Almaniyanın bir çox şəhərlərində Xocalı faciəsi ilə bağlı keçirdikləri tədbirlərdən söhbət açmışdır. O, tədbirlərin hər birində Xocalıda törədilən kütləvi qırğının əsl vəhşilik, soyqırımı olduğunu alman ictimaiyyətinə çatdırmağa çalışdıqlarını vurğulamışdır.
Tədbirdə Xocalı faciəsini əks etdirən videoçarx nümayiş etdirilmişdir.
Bölmənin digər xəbərləri
