Xocalı yarası iyirmi iki ildir ki, ürəkləri göynədir
Daşkəsən, 26 fevral (AZƏRTAC). Daşkəsənlilər erməni cəlladlarının Xocalıda törətdikləri qanlı faciəni 22 ildir ki, böyük kədərlə yad edirlər.
AZƏRTAC xəbər verir ki, Xocalı soyqırımının növbəti ildönümünə həsr olunmuş anım mərasimi Şəhidlər xiyabanının ziyarəti ilə başlamışdır. Rayon ictimaiyyətinin nümayəndələri, məktəblilər torpaqlarımızın bütövlüyü uğrunda qurban getmiş mərd oğulların məzarları üzərinə gül dəstələri düzmüşlər.
Sonra tədbir rayon icra hakimiyyətində davam etdirilmişdir. Rayon icra hakimiyyətinin başçısı Əhəd Abıyev 1992-ci il fevralın 25-dən 26-na keçən gecə erməni cəlladlarının Xocalıda törətdikləri vəhşilikdən danışaraq qeyd etmişdir ki, xalqımıza vurulan bu yara 22 ildir ürəkləri göynədir və hər birimizi torpaqlarımızın azad olunması uğrunda mübarizəyə səfərbər edir. Bu qan yerdə qalmayacaqdır. Prezidenti İlham Əliyevin işğal olunmuş torpaqlarımızın azad olunması istiqamətində gördüyü işlər onu deməyə əsas verir ki, Azərbaycanın ərazi bütövlüyü mütləq təmin olunacaqdır.
Rayon ağsaqqallarının, ziyalıların çıxışından sonra şəhərdəki 2 saylı orta məktəbin şagirdləri “Xocalı harayı” adlı ədəbi-bədii kompozisiya nümayiş etdirmişlər.
Bölmənin digər xəbərləri
