YANINDA QADIN OTURAN SÜRÜCÜLƏR AVTOMOBİLİ EHTİYATLA SÜRÜRLƏR
Sorğuda iştirak edən 500 qadın və kişinin sözlərinə görə, sürücünün yol hərəkəti qaydalarını xatırlamasına, maşını ehtimalla sürməsinə təsir göstərən başlıca amil yanında sərnişin olmasıdır. Özü də sürücünün yanında kimin oturması həlledici rol oynayır.
Zərif məxluqla yol gedən kişilərin əksəriyyəti sürəti azaldır, dəlisovluq etmir, maşını çox ehtiyatla sürürlər. Kişi sürücülərin 65 faizi hesab edir ki, qadınlar kövrək məxluqlardır, ona görə də onların ürəyini yolda hoqqa çıxarmaqla deyil, son dərəcə ehtiyatlı davranmaqla ovlamaq olar. Sözsüz, belə yanaşmanın öz məntiqi var. Ekspertlər xanımların sürücülərə yaxşı təsir göstərdiyi barədə fərziyyələrini sübut etmək üçün daha bir tədqiqat aparmış və bu zaman sürücünün maşını idarə etmək tərzinin necə dəyişdiyinü müşahidə etmişlər. “Gizli kamera”nın nəticələri kişilərin etirafı ilə üst-üstə düşmüşdür.
Xanımlara gəldikdə isə, gizli müşahidələrin nəticələrinə görə, onların əksəriyyəti sərnişinin hansı cinsin nümayəndəsi olmasının fərqinə varmadan, maşını ehtiyatla sürməyə başlayırlar. Lakin sorğuda iştirak edənlərin bir çoxu tamamilə bunun əksinə informasiya vermişlər. Xanımların 71 faizinin sözlərinə görə, onlar heç bir halda hər hansı kişi sərnişinə görə sürəti azaltmaq və ehtiyatlı olmaq niyyətində deyillər.
