Bakı, 3 iyun, AZƏRTAC

İyunun 3-də Yeni Azərbaycan Partiyası (YAP) Xətai rayon təşkilatının ərazi partiya təşkilatlarında fəallarla görüşlər keçirilib.

AZƏRTAC xəbər verir ki, görüşlərdə çıxış edən YAP Xətai rayon təşkilatının sədri Vüqar Rəhimzadə müasir müstəqil Azərbaycan dövlətinin qazandığı uğurlardan geniş bəhs edib. Bildirilib ki, Azərbaycan hazırda inkişaf modeli ilə dünyanın diqqətindədir. Möhkəm təməl uğurların davamlılığında əhəmiyyətli rol oynayır. Ulu öndər Heydər Əliyevin düşünülmüş və məqsədyönlü siyasəti, son 18 ildən artıq dövrdə bu xəttin Prezident İlham Əliyev tərəfindən uğurla davam etdirilməsi Azərbaycana biri-birindən möhtəşəm uğurlar qazandırır. Artıq iki ilə yaxındır ki, tarixi Zəfərimizin, işğaldan azad edilmiş ərazilərimizdə həyata keçirilən genişmiqyaslı bərpa-quruculuq işlərinin sevincini yaşayırıq. Azərbaycan xalqı bu şanlı Qələbə ilə bir daha məğrurluğunu, yenilməzliyini dünyaya nümayiş etdirdi. Bu Zəfər, eyni zamanda, Azərbaycan xalqının torpaq, Vətən sevgisinin nümayişi oldu. Azərbaycan gəncliyi “Vətəndən pay olmaz” deyib dövlətimizin başçısı, Müzəffər Ali Baş Komandan İlham Əliyevin əks-hücum əmrinə yüksək səviyyədə, böyük ruh yüksəkliyi ilə cavab verərək silaha sarıldı və 44 gündə 30 ilin işğalına son qoyaraq tarix yazdı.

Vüqar Rəhimzadə tarixi Zəfərimizin yaratdığı reallıqlardan, Azərbaycanın qarşısında yaranan yeni üfüqlərdən söz açıb. Qeyd edilib ki, Azərbaycan qalib ölkə kimi regionda və dünyada cərəyan edən proseslərin mərkəzində dayanaraq, sözünün imzası qədər əhəmiyyətli olduğunu təsdiqləyir. YAP Xətai rayon təşkilatının sədri Azərbaycanın uğurlarında, ictimai-siyasi həyatında aparıcı rol oynayan, nəinki ölkəmizin, Cənubi Qafqazın aparıcı siyasi təşkilatı olan Yeni Azərbaycan Partiyasının uğurlarımızda rolundan danışıb. Bildirib ki, YAP dövlət müstəqilliyinin möhkəmləndirilməsi, ərazi bütövlüyü, ictimai həmrəylik, sabit və sosial istiqamətli iqtisadiyyat yaratmaq, milliyyətindən, dinindən, dilindən asılı olmayaraq hər bir Azərbaycan vətəndaşının hərtərəfli inkişafı və müdafiəsini təmin etmək məqsədilə yaradılan partiyadır. Ulu öndər Heydər Əliyevin yaradıcısı olduğu, hazırda sıralarında 800 minə yaxın üzvü birləşdirən YAP Sədri, Prezident İlham Əliyevin rəhbərliyi ilə daha da inkişaf edərək, cəmiyyətin avanqard qüvvəsinə çevrilib. Partiyanın fəaliyyətində dövlətə, xalqa xidmətin əsas prinsip kimi qəbul olunması bu siyasi qüvvənin atdığı hər addımında, irəli sürdüyü təşəbbüslərində və qəbul etdiyi qərarlarında özünü nümayiş etdirir.

V.Rəhimzadə xatırladıb ki, ötən ilin martında Zəfərimizin reallıqları fonunda YAP-ın VII qurultayı keçirilib. Qurultayda qarşıya yeni vəzifələr qoyulub. Yeni qəbul olunan Nizamnamə və təsdiqlənən Proqram yeni qərarların icrasını şərtləndirir. Yeni Azərbaycan Partiyasının digər rayon təşkilatları kimi, YAP Xətai rayon təşkilatı da üzərinə düşən vəzifəni yüksək səviyyədə yerinə yetirməyə səy göstərir. Hədəflərə vaxtında və yüksək səviyyədə nail olmaq üçün səylərin birləşdirilməsi, bütün qüvvə və bacarıqların səfərbər edilməsi mütləqdir. Sıralarında 18 minə yaxın üzvü birləşdirən YAP Xətai rayon təşkilatının ərazi partiya təşkilatları qarşıda dayanan vəzifələrin icrasında fəallıq nümayiş etdirirlər.

Görüşlərdə YAP sıralarına yeni qəbul olunanlara partiyanın üzvlük vəsiqəsi, bir qrup fəala isə rayon təşkilatının həyatında fəal iştirakına görə Fəxri fərmanlar təqdim olunub.