SİYASƏT
YAP Xəzər rayon təşkilatı Yeni Azərbaycan Partiyasının yaranmasının 21-ci ildönümü münasibətilə tədbir keçirilmişdir
Bakı, 20 noyabr (AZƏRTAC). Yeni Azərbaycan Partiyasının (YAP) yaranmasının 21-ci ildönümü münasibətilə Xəzər rayonunda tədbir keçirilmişdir.
AZƏRTAC xəbər verir ki, tədbirdə YAP icra katibinin müavini, Milli Məclisin deputatı Siyavuş Novruzov, YAP İdarə Heyətinin üzvü Kərim Kərimov, deputat Rauf Əliyev, Xəzər Rayon İcra Hakimiyyətinin başçısı Gülağa İslamov və partiya fəalları iştirak etmişlər.
Tədbiri giriş sözü ilə YAP Xəzər rayon təşkilatının sədri, YAP Siyasi Şurasının üzvü Namiq Əhmədov açaraq partiyanın keçdiyi şərəfli yoldan geniş bəhs etmişdir.
Bildirilmişdir ki, 1992-ci il noyabrın 21-də təsis konfransını müxtəlif bölgələrdən olan 550 nümayəndənin iştirakı ilə Naxçıvanda keçirən YAP-ın sıraları çox keçmədən kəmiyyət və keyfiyyət baxımından daha da möhkəmlənmişdir. 21 illik tarixdə şərəfli yol keçmiş YAP biri-birindən əhəmiyyətli uğurlara imza atmaqla cəmiyyətdə nüfuzunu, siyasi çəkisini daha da artırmışdır. Bu gün partiyanın sıralarında 600 mindən çox üzvün birləşməsi Heydər Əliyev ideyalarına sədaqətin, həyata keçirilən siyasətin gələcəyinə inamın təsdiqidir.
YAP icra katibinin müavini, Milli Məclisin deputatı Siyavuş Novruzov tədbirdə çıxış edərək demişdir ki, yarandığı gündən partiya siyasi mübarizələrlə zəngin bir yol keçmişdir.
YAP dövlətçiliyimizin qarantıdır - deyən S.Novruzov ulu öndər Heydər Əliyev tərəfindən 91-lərin müraciətinə cavabını xatırlamışdır. Həmin müraciətdə ümummilli lider Heydər Əliyev bildirmişdir: “Güman edirəm ki, müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və siyasi plüralizm şəraitində sizin müraciətinizdə göstərilən Yeni Azərbaycan Partiyasının yaradılması obyektiv zərurətdən doğur. Belə partiya Azərbaycanın ictimai-siyasi həyatında fəal iştirak edərək yeni müstəqil Azərbaycan dövlətinin möhkəmləndirilməsində və inkişafında tarixi rol oynaya bilər”.
S.Novruzov partiyanın bugünkü uğurlarının gələcəyə daha böyük əminliklə yanaşmağa əsas verdiyini diqqətə çatdırmışdır. YAP ölkədə keçirilən bütün seçki proseslərində uğur qazanmaqla xalqın partiyası olduğunu təsdiqləmişdir.
Toplantıda çıxış edənlərdən Milli Məclisin deputatı Rauf Əliyev ölkəmizin uğurlarından danışmışdır.
Qeyd olunmuşdur ki, ümummilli lider Heydər Əliyevin xalqın təkidli tələbi ilə hakimiyyətə qayıdışı, YAP-ın iqtidar partiyası kimi fəaliyyəti Azərbaycanın bugünkü uğurlarını təmin edən ən başlıca şərt olmuşdur.
Xəzər Rayon İcra Hakimiyyətinin başçısı Gülağa İslamov paytaxt və bölgələrdə geniş vüsət alan abadlıq, quruculuq işlərindən danışmışdır. Nəzərə çatdırılmışdır ki, Ulu Öndərin düzgün müəyyənləşdirdiyi siyasətin Prezident İlham Əliyev tərəfindən uğurla davam etdirilməsi nəticəsində ölkəmizin hərtərəfli inkişafı təmin edilmiş, Azərbaycan dinamik iqtisadi inkişafı ilə dünyanın diqqətini özünə cəlb etmişdir.
Toplantıda digər çıxış edənlər də partiyanın bu gün nəinki ölkəmizdə, regionda aparıcı siyasi təşkilat olduğunu qeyd etmişlər.
Tədbirin sonunda YAP Xəzər rayon təşkilatının fəallarına fəxri fərmanlar təltif edilmişdir.