Yaponiya Şimali Koreyaya qarşı sanksiyaları daha iki il müddətinə uzadıb
Tokio, 9 aprel, AZƏRTAC
Yaponiya hökuməti Şimali Koreyaya qarşı ticari qadağaları və digər sanksiyaları daha iki il müddətinə uzadıb.
AZƏRTAC xəbər verir ki, bu barədə qərar Yaponiya Nazirlər Kabinetinin aprelin 9-da keçirilən iclası zamanı qəbul edilib.
Xatırladaq ki, Yaponiyanın Şimala Koreyaya qarşı tətbiq etdiyi ticari qadağaların, o cümlədən Şimali Koreya gəmilərinin, həmçinin bu ölkə limanlarından gələn xarici gəmilərin yapon limanlarına daxil olması barədə qadağanın müddəti aprelin 13-də başa çatır.
Bu tədbirlər Yaponiyanın Şimali Koreyanın həyata keçirdiyi nüvə sınaqları və ballistik raketlərin buraxılışı ilə əlaqədar 2006-cı ildə tətbiq etdiyi birtərəfli sanksiyaların tərkib hissəsidir.
Yaponiya hökuməti ABŞ və Cənubi Koreya ilə əməkdaşlıq şəraitində sanksiyaları davam etdirməyi planlaşdırır.
Cari ilin fevralında keçirilən ABŞ-Şimali Koreya sammitinin razılıq əldə edilmədən başa çatmasından sonra Pxenyanın nüvə silahlarının ləğvinə inam perspektivləri son aylar qismən zəifləyib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
