MƏDƏNİYYƏT
Yaponiyada yaşayan azərbaycanlı uşaqlar üçün göndərilmiş nəşrlər Azərbaycanın bu ölkədəki səfirliyinə təqdim olunmuşdur VİDEO
Tokio, 16 avqust (AZƏRTAC). Yaponiyada yaşayan azərbaycanlı uşaqlar üçün Firudin bəy Köçərli adına Respublika Uşaq Kitabxanası tərəfindən göndərilmiş nəşrlər avqustun 16-da Azərbaycanın bu gündoğar ölkədəki səfirliyinə təqdim edilmişdir.
Kitabxananın əməkdaşı Təranə Hümbətova bildirmişdir ki, Yaponiyada yaşayan azərbaycanlı uşaqlar üçün hədiyyə olaraq müxtəlif kitab və jurnallar göndərmişdir.
Azərbaycan Prezidenti İlham Əliyevin xaricdə yaşayan həmvətənlərimizə xüsusi diqqət və qayğı ilə yanaşdığını vurğulayan T.Hümbətova qeyd etmişdir ki, kitabxananın rəhbərliyi də bu məsələni diqqət mərkəzində saxlayır, dünyanın müxtəlif guşələrindəki azərbaycanlı uşaqları yaddan çıxarmır.
T.Hümbətova demişdir: “Kitabxanamızın rəhbərliyi həmin uşaqların Azərbaycan ədəbiyyatını, tarixini, mədəniyyətini yaxından öyrənməsinə kömək etməyə çalışır. Onlar Vətəndən uzaqda yaşasalar da, dilimizi və mədəniyyətimizi unutmamalı, mənsub olduqları xalqın mənəvi dəyərlərini mənimsəyərək yaşadıqları ölkədəki həmyaşıdlarına da çatdırmalıdırlar. Kitabxanamızın uşaqlara hədiyyə olaraq göndərdiyi nəşrlər arasında məhz bu mövzuda nəşrlər üstünlük təşkil edir. Yaponiyadakı azərbaycanlı uşaqlar onların vasitəsilə şifahi ədəbiyyatımızı, nağıllarımızı öyrənəcək, kitabxana tərəfindən nəşr olunan “Göy qurşağı” jurnalının köməyi ilə Azərbaycandakı həmyaşıdları ilə tanış olmaq imkanı əldə edəcəklər.
Nəşrlər arasında ingilis və rus dilində olan ədəbiyyat da vardır ki, bu da uşaqlara həmin dilləri daha yaxşı öyrənməyə kömək edəcəkdir.
İnanıram ki, bu gündoğar ölkədə yaşayan uşaqlar Vətəndən uzaqda olsalar da, Azərbaycanı ürəkdən sevən vətənpərvər insanlar kimi böyüyəcək, ölkəmizi Yaponiyada layiqincə təmsil edəcəklər”.
Yaponiyada yaşayan azərbaycanlı uşaqlara göndərilmiş nəşrlərə görə kitabxananın rəhbərliyinə minnətdarlığını bildirən Azərbaycanın bu ölkədəki səfiri Gürsel İsmayılzadə qeyd etmişdir ki, bu, həqiqətən də təqdirəlayiq işdir. Doxsana yaxın nəşr içərisində həm Azərbaycan, həm də rus və ingilis dillərində müxtəlif kitab, jurnal və lüğətlərin olmasını yüksək qiymətləndirən səfir demişdir ki, bu cür nəşrlər Yaponiyada yaşayan azərbaycanlı uşaqlara şifahi ədəbiyyatımızı yaxından öyrənməyə, eyni zamanda əcnəbi dilləri mənimsəməyə şərait yaradacaqdır. G.İsmayılzadə səfirlikdə bu nəşrlər üçün xüsusi guşə ayrılacağını və bütün azərbaycanlı uşaqların ondan sərbəst istifadə etməsinə imkan yaradılacağını bildirmişdir.
Tədbirdə iştirak edən azərbaycanlı uşaqlar Azərbaycandan göndərilən nəşrlərlə yaxından tanış olmuş, Vətənə, ümummilli lider Heydər Əliyevə həsr olunmuş şeirlər söyləmişlər.
Vüqar Ağayev
AZƏRTAC-ın xüsusi müxbiri
Tokio