Azərbaycan Respublikasının Prezidenti İlham Əliyev oktyabrın 23-də Yardımlı rayonuna gəldi.

Yardımlı qəsəbəsinin mərkəzindəki Heydər Parkına toplaşan minlərlə sakin dövlətimizin başçısını hörmət və ehtiramla, hərarətli alqışlarla qarşıladı. Onların əllərində Prezidenti salamlayan şüarlar, ulu öndər Heydər Əliyevin və respublikamızın rəhbərinin portretləri və Azərbaycanın dövlət bayraqları var idi.

Dövlətimizin başçısı əvvəlcə xalqımızın ümummilli lideri Heydər Əliyevin abidəsi önünə gül dəstəsi qoydu, sonra Yardımlı rayonuna ilk dəfə olaraq təbii qazın verilməsini bildirən məşəli alovlandırdı.

Bu münasibətlə keçirilən mərasimi açan Yardımlı Rayon İcra Hakimiyyətinin başçısı XƏZƏR ASLANOV Masallı-Yardımlı avtomobil yolunun əsaslı şəkildə bərpasını və yenidən qurulmasını və qaz kəmərinin çəkilişini rayonun həyatında tarixi hadisələr kimi dəyərləndirdi. O, ötən ilin may ayından bəri rayonda 31 məktəbin tikildiyini və 7 məktəbin əsaslı təmir edildiyini bildirərək vurğuladı ki, həmin məktəblərdən 9-u Heydər Əliyev Fondunun təşəbbüsü ilə inşa edilmişdir. Uzun illər təhsil müəssisələri yarıtmaz vəziyyətdə olan Yardımlıya bu cür yüksək qayğıya görə dövlətimizin başçısına, habelə Heydər Əliyev Fondunun prezidenti, Milli Məclisin deputatı Mehriban Əliyevaya rayon əhalisi adından dərin minnətdarlıq bildirildi.

İcra hakimiyyətinin başçısı qəsəbəyə ikinci içməli su xəttinin çəkildiyini söylədi və görülən digər işlərdən danışaraq dedi:

- Möhtərəm Prezident, rayonun iki kəndində yeni xəstəxana binası və həkim ambulatoriyası istifadəyə verilmişdir. Sizin göstərişinizlə rayon mərkəzi xəstəxanasının təmirinə başlanmışdır. Kənd təsərrüfatının inkişafı məqsədi ilə “Aqroservis” müəssisəsi yaradılmış və texnika alınıb gətirilmişdir. Hazırda həmin texnikadan rayon sakinləri istifadə edirlər.

Cənab Prezident, az müddət ərzində rayon üçün ən vacib problem olan yolun və qaz xəttinin istifadəyə verilməsini, bu tarixi anlarda Sizin şəxsən burada iştirak etməyinizi, sevincimizə şərik olmağınızı, bu ucqar rayona və onun əhalisinə böyük diqqət və qayğınızın təzahürü kimi qəbul edirik. Yardımlı əhalisi Sizi sevir, dəstəkləyir. Problemlərinin ardıcıl surətdə həll olunmasına görə Sizə ürəkdən minnətdarlığını bildirir.

“Azəriqaz” Qapalı Səhmdar Cəmiyyətinin sədri ƏLİXAN MƏLİKOV ulu öndər Heydər Əliyevin tapşırığına əsasən 2000-ci ildən başlayaraq respublikamızın bölgələrinə təbii qazın verilməsi məqsədi ilə ardıcıl tədbirlərin həyata keçirildiyini, 2001-ci ildə Gəncənin qaz təchizatının bərpa olunduğunu, daha sonra qısa müddətdə 32 rayona mavi yanacağın verilməsinə başlandığını, 13 illik fasilədən sonra isə Naxçıvan Muxtar Respublikasına, habelə İmişli rayonuna da qaz verildiyini xatırlatdı. O, hətta sovet dövründə belə mavi yanacaqla təchiz edilməyən Lerik və Yardımlıya təbii qaz kəmərinin çəkilməsini isə əsil tarixi hadisə kimi səciyyələndirərək dedi:

- Astara-Qazıməmməd magistral qaz kəmərinin 65-ci kilometrindən, Masallı rayonunun Tüklə kəndi yaxınlığından başlayaraq Ordaxal kəndinə qədər təzyiqi 15 atmosfer olan 28 kilometr uzunluğunda 325 millimetrlik, Ordaxal kəndindən Yardımlı qəsəbəsinə qədər 28 kilometr uzunluğunda 219 millimetrlik magistral qaz kəməri çəkilib istismara verilmişdir. Yardımlı rayon mərkəzində bir qazpaylayıcı stansiya inşa edilmiş və 30 kilometrədək müxtəlif diametrli qaz xətləri çəkilmiş, 11 ədəd qaztənzimləyici quraşdırılmışdır. Rayon mərkəzində qaz təminatı və ölçü qovşağına nəzarət məqsədi ilə normal iş şəraiti və kommunikasiyalarla təmin olunmuş operator binasının və qaz istismarı idarəsi üçün inzibati binanın tikilib istifadəyə verilməsi başa çatdırılmışdır.

Magistral boruların çəkilməsi dəniz səviyyəsindən 1200-1500 metr hündürlükdə 36 yol və 6 çay keçidindən, 12 kilometr uzunluğunda sıldırım qayalardan və 10 kilometr sıx meşəlikdən keçməklə inşa olunmuşdur. Layihənin icrası ilə bağlı 11 milyon 500 min manatlıq, o cümlədən büdcə vəsaiti hesabına 9 milyon 180 min manatlıq iş görülmüşdür. Kəmərin çəkilməsində həm yerli əhali, həm də digər mütəxəssislər iştirak etmişlər. Yardımlı qaz istismarı sahəsi üzrə 22 nəfər daimi işlə təmin olunmuşdur.

Möhtərəm cənab Prezident!

Sizin tapşırığınızla Lerik və Yardımlı rayon mərkəzlərində təbii qaz veriləcək bütün abonentlər “Azəriqaz” Səhmdar Cəmiyyətinin vəsaiti hesabına qaz pilətəsi və sayğacla təmin olunacaqlar. Hazırda Yardımlı qəsəbəsində evlərdə mətbəx sobaları və sayğaclar quraşdırılır. İlin sonuna kimi bu işlər başa çatdırılacaqdır. Satılan qazın uçotu müasir tələblərə cavab verən və xüsusi proqram təminatı vasitəsilə işləyən abonent-kompyuter sistemi ilə aparılacaq, hər bir abonentlə fərdi qaydada müqavilə bağlanacaqdır.

Möhtərəm cənab Prezident, bu işlərin davamı olaraq Sizin tapşırığınızla Ağcabədi və Beyləqan rayonlarının qaz təminatının bərpası üçün layihə-smeta sənədlərinin hazırlanması işlərinə başlanmışdır. 2007-ci ildə bu rayonların qazlaşdırılması davam etdiriləcəkdir.

Möhtərəm cənab Prezident, “Azəriqaz” Səhmdar Cəmiyyətinin kollektivi adından Sizi əmin edirəm ki, respublikada əhalinin və iqtisadiyyatın təbii qazla fasiləsiz və təhlükəsiz təmin olunması üçün bütün imkanlardan istifadə ediləcək, qarşımızda qoyulan bütün tapşırıqlar vaxtında və layiqincə yerinə yetiriləcəkdir.

Ağsaqqallar adından çıxış edən respublikanın əməkdar həkimi ZEYNİ ADİYEV dövlətimizin başçısına rayon əhalisinin ən xoş arzularını yetirərək dedi:

-Çox hörmətli möhtərəm Prezidentimiz cənab İlham Əliyev!

İcazə verin, rayonumuzun bütün ağsaqqalları, əmək veteranları, ümumiyyətlə, bütün yardımlılıların adından Sizi səmimi qəlbdən salamlayım və dağlar qoynunda yerləşən Yardımlıya “Xoş gəlmisiniz!” deyim.

Bugünkü gün yardımlılıların həyatında, çox əlamətdar günlərdən biridir. Sevimli Prezidentimiz bizə verdiyi vədə sadiq qalaraq, vaxtının olmamasına, işinin çoxluğuna baxmayaraq, dediyi kimi, ikinci dəfə Yardımlıya səfər edir, burada insanlarla görüşür, onların həyat tərzi ilə təzədən tanış olur.

Möhtərəm Prezident, xoşbəxtlikdən budəfəki səfəriniz Ramazan bayramına təsadüf etmişdir. Mən buna çox sevinmişəm, çünki Ramazan bayramında həmişə dostlar yığışır, birlikdə bayram edirlər. Əgər bizim bu bayramımıza Prezident özü gəlib çıxıbsa, bu, bir olan Allahın bizə verdiyi böyük xoşbəxtlikdir. Deməli, Siz bizim təkcə Prezidentimiz deyilsiniz, həm də yardımlılıların sədaqətli dostusunuz. Möhtərəm Prezident, düzünü deyim ki, belə bir dosta biz yardımlılıların çox böyük ehtiyacı var.

Bilmirəm, Yardımlıya bu adı nə vaxt qoyublar, mənə məlum deyil, amma Yardımlının həmişə dövlət yardımına, dost yardımına ehtiyacı olubdur. Mənim xeyli yaşım var, özüm canlı şahidəm ki, Yardımlı camaatı dövlət tərəfindən heç bir yardım görməyibdir. Əksinə, bir çox hallarda dövlətə yardım edibdir. Süfrəsində, tabağında nə var, hökumətə verib, özü ac qalıbdır. Amma bunun müqabilində o cür qüdrətli sovet dövləti uzun illər Yardımlıda, heç olmasa, bir məktəb binası tikmirdi.

Yalnız ulu öndərimiz Heydər Əliyev hakimiyyətə gələndən sonra, - düzdür, elə bir vaxtda hakimiyyətə gəldi ki, onun Yardımlıya gəlməyə imkanı yox idi, amma Yardımlıya onun əməlləri gəlib çıxdı, - alimlər, mütəxəssislər Yardımlıya gəldilər, axtardılar, fikirləşdilər ki, bu rayonun iqtisadiyyatını qaldırmaq üçün nə etmək lazımdır. Möhtərəm Prezident, burada nə qədər binalar tikildi, üzüm bağları salındı, tütün plantasiyaları yaradıldı. Qızlarımız-gəlinlərimiz işləyib pul qazanmağa başladılar. Bunlar hamısı Sizin atanızın unudulmaz xidmətləridir.

Bax, yanında dayandığımız bu möhtəşəm xəstəxana binası Sizin atanızın yadigarıdır. Mən o zaman baş həkim işləyirdim. Bilirdim, görürdüm ki, burada tikinti işi aparmaq nə qədər çətindir. Əgər Heydər Əliyev olmasaydı, heç bir podratçı təşkilat bu işin altına girməzdi. Yalnız Heydər Əliyevin ciddi səyi, tələbkarlığı nəticəsində bu bina tez bir zamanda istifadəyə verildi.

Diqqətinizə çatdırım ki, bina 1983-cü ilin dekabr ayında istifadəyə verilmişdir. O zaman cənab Heydər Əliyev Moskvada idi və Həsən Həsənov bizi - baş həkimləri, raykomun katiblərini, icraiyyə komitələrinin sədrini, tikinti təşkilatlarının rəhbərlərini təcili Bakıya çağırdı. Bizə dedi ki, Heydər Əliyev Moskvadan gündə zəng edir, xəstəxanaların vəziyyətini soruşur. Tapşırığı bu oldu ki, nəyin bahasına olur-olsun, təcili surətdə bu tikintiləri başa çatdıraq. Nə qədər çətin bir işdir.

Amma indi görün, möhtərəm Prezident, Sizin rəhbərliyiniz dövründə, bu qısa bir müddətdə Yardımlıda nə qədər işlər görülübdür. Bu, yaşlı adam olan mənə röya, yuxu kimi görünür. Amma Allah bəzən yuxuları çin edir.

Bütün bunlar bir tərəfə, nə olar, hökumətdir, Prezident sərəncam verib, yol da, qaz xətti də çəkilibdir. Biz buna görə hamımız Sizə minnətdarıq. Amma Sizin gəlib bizi yoluxmağınız bizi çox məmnun edir. Bu, nədən irəli gəlir? Ondan irəli gəlir ki, Siz Azərbaycanın torpağını sevirsiniz, onun hər bölgəsini sevirsiniz. Siz Azərbaycan xalqını sevirsiniz. Onun hər bir vətəndaşını sevirsiniz. Andiçmə mərasimində “Qurani-Kərim”ə əlinizi basıb, “Mən hər bir azərbaycanlının Prezidenti olacağam” deməyiniz, bu gün buraya gəlməyiniz - bunun canlı sübutudur, biz bunun canlı şahidləriyik. Möhtərəm Prezident, bu müsbət keyfiyyətlər Sizdə təsadüfi deyil, Sizin soykökünüzdən gəlir, rəhmətlik atanızdan, rəhmətlik babanızdan gəlir.

Möhtərəm Prezident, mən böyük insan, gözəl həkim Əziz Əliyevin tələbəsi olmuşam. Siz elə bir kişinin nəvəsisiniz. 48 ildir Yardımlıda həkim işləyirəm. Onun 30 ilini burada səhiyyə təşkilatına başçılıq etmişəm. Çalışmışam təxminən bu yarım əsrdə elə işləyim ki, rəhmətlik babanızın ruhu, müəllimimin ruhu məndən inciməsin. Buna nə qədər nail olmuşam, bilmirəm, amma hiss edirəm ki, camaat üzümə gülür.

Atanız dünyada məşhur dövlət xadimi, dünya siyasətinin korifeylərindən idi. Kiçik Azərbaycanda yaşayıb böyük dünya siyasətinə güclü təsir göstərə bilən belə bir şəxsiyyətin övladı bəs necə olmalıdır? Biz xoşbəxtik ki, belə bir övlad bizə, bizim Azərbaycan xalqına rəhbərlik edir. Bizim tarixçilərimiz, xalqımız nahaq yerə demirlər ki, Heydər Əliyev Azərbaycanın xilaskarıdır. Bəli, bu belədir. Möhtərəm Prezident, çox gözəldir ki, Sizə böyük inam var. Biz Sizə Heydər Əliyevin özü qədər inanırıq. Çünki verdiyiniz vədləri dəqiqliklə yerinə yetirirsiniz. Siz Heydər Əliyev tərəfindən müəyyən edilmiş o zəfər yolu ilə inamla, ilhamla irəli gedirsiniz. Azərbaycan xalqını inkişafın zirvələrinə doğru aparırsınız.

Bu yol Heydər Əliyev yoludur. Bu yol qədim İpək Yolundan keçir, Bakı-Ceyhan neft kəmərindən keçir. Bu yol Günəşin arxasınca gedir və bu yolu Günəş işıqlandırır. Bu yol Azərbaycan xalqının inkişaf etmiş Avropa ölkələrinin iqtisadiyyatına inteqrasiyası yoludur. Möhtərəm Prezidentimiz, bu yolu axıracan davam etdirmək məsuliyyəti Sizin üzərinizə düşmüşdür. Yüz faiz arxayınam ki, Siz onu ləyaqətlə yerinə yetirəcəksiniz. Təsəvvür edin, üç ayda Masallıdan buraya 53 kilometrlik yol çəkildi!

Möhtərəm Prezident, məlumat üçün xatırladım ki, son bir-iki ildə çox ailələr şəhərə köçüblər. Şəhərdə yaşamaq istəyirlər, orada qaz var, su var, yol var. Bunu hər adam edə bilər, bu, bir qəhrəmanlıq deyil. Amma gərək yaşadığın kəndi, obanı şəhərə döndərəsən. Bax, mən qəhrəmanlıq buna deyərəm. Bu qəhrəmanlıq da, möhtərəm Prezident, Sizin kimi gözəl insanların, nəcabətli insanların rəhbərlik etdiyi ölkədə mümkündür.

Bu qaz xəttinin çəkilməsi bizə çox şey vəd edir. Təsəvvür edin, Yardımlının təbii sərvətləri olan meşələr qalmır, qırılır. Bu, onun qarşısını alır. İndi səhər-səhər bizim qadınlar durub balalarını məktəblərə yola salanda çay qoymaqdan ötrü çəpəri söküb yandırmayacaqlar. Kibrit çəkib qazı yandıracaq, çay qoyacaqlar. Orada yanan təkcə o qaz deyil, həm də Sizin qəlbinizin xalqa olan məhəbbətinin istisi, hərarətidir. Buna görə Sizə minnətdarıq.

Biz xoşbəxtik ki, Sizinlə bir dövrdə yaşayırıq. Biz xoşbəxtik ki, Sizin rəhbərlik etdiyiniz müstəqil Azərbaycan Respublikasının vətəndaşıyıq. İnanırıq ki, bizim xoş gələcəyimizin açarı Sizin əlinizdədir. Siz bu işi müvəffəqiyyətlə yerinə yetirəcəksiniz. Qoy bu işdə Allah Sizə yar olsun. Diqqətinizə görə minnətdaram.

X X X

Azərbaycan Prezidenti İlham Əliyev mərasimdə nitq söylədi.

X X X

Prezident İlham Əliyev sonra ağsaqqallarla və ictimaiyyətin nümayəndələri ilə səmimi söhbət etdi, ölkənin iqtisadi imkanları artdıqca Azərbaycanın bütün bölgələrinin hərtərəfli inkişafı üçün daha böyük işlərin görüləcəyini vurğuladı.