“YARIMÇIQ ƏLYAZMA” MOSKVADA NƏŞR OLUNMUŞDUR
Nəfis tərtibatda nəşr olunmuş romanı rus dilinə Vaqif İbrahimoğlu tərcümə etmişdir. Kitaba ön söz yazan görkəmli rus ədəbiyyatşünas-alimi, filosof Lev Anninski V.İbrahimoğlunun işini “virtuozluqla edilmiş tərcümə” adlandırmışdır.
Roman Bakıda nəşr olunduğu zamandan həm Azərbaycanda, həm də xarici ölkələrdə geniş müzakirələrə səbəb olmuş, onun haqqında Fransa, Rusiya və Türkiyə mətbuatında fikir söylənmiş, məqalələr çap etdirmişlər (Klod Alliber, Lev Anninski, İrfan Ülkü və başqaları). “Yarımçıq əlyazma” ötən il Fransada nüfuzlu “L.Harmattan” nəşriyyatının öz təşəbbüsü ilə tərcümə və çap olunmuş, Fransanın ölkəmizdəki səfirliyi Bakıda həmin nəşrin təqdimat mərasimini keçirmişdir.
Mətbuatda xəbər verildiyi kimi, “Yarımçıq əlyazma” romanı yaxın vaxtlarda Türkiyədə nəşr olunacaqdır. Roman hazırda yunan və latış dillərinə də tərcümə edilir.
Postmodern təfəkkürün, yaradıcı ədəbi zövqün məhsulu olan “Yarımçıq əlyazma” sərhədləri aşmaqda davam edir. Bu, bir müəllif kimi təkcə Kamal Abdullanın deyil, bütövlükdə Azərbaycan ədəbiyyatının uğurudur.
Bölmənin digər xəbərləri
