Yazıçı-alim Sadıq Qarayevin əsərlərində azərbaycançılıq idealları mövzusunda silsilə tədbirlər keçirilib
Bakı, 5 noyabr, AZƏRTAC
Vətən müharibəsində Zəfərin 5-ci ildönümü münasibətilə Naxçıvanda Şərur rayonu Mədəniyyət evində, Naxçıvan Dövlət Universitetində (NDU) və AMEA-nın Naxçıvan bölməsində “Azərbaycançılıq məfkurəsi dövlətçiliyimizin və zəfərlərimizin işıqlı yoludur: yazıçı-alim Sadıq Qarayevin əsərlərində azərbaycançılıq idealları və qələbənin vəhdəti” mövzusunda tədbirlər keçirilib.
Bu barədə AZƏRTAC-a yazıçı-alim Sadıq Qarayev məlumat verib.
Şərur rayonu Mədəniyyət evində baş tutan tədbirdə Naxçıvan Muxtar Respublikası Yazıçılar Birliyinin sədri, Əməkdar mədəniyyət işçisi Asim Yadigar, Azərbaycan Yazıçılar Birliyinin üzvü, “Kredo” qəzetinin baş redaktoru Əlirza Xələfli, AMEA Tarix İnstitutunun aparıcı elmi işçisi dosent İlham Həsənov və yazıçı, biologiya üzrə fəlsəfə doktoru Sadıq Qarayev çıxış ediblər.
Naxçıvan Dövlət Universitetinin Elmi kitabxanasında keçirilən tədbirdə kitabxananın direktoru filologiya üzrə fəlsəfə doktoru Xumar Məmmədova yazıçının yaradıcılıq yolu, elmi fəaliyyəti barədə məlumat verib, həm elmi-fəlsəfi, həm də bədii üslubda yazdığı kitablarını görüş iştirakçılarına təqdim edib. Çıxışlardan sonra tələbələrin və müəllimlərin sualları cavablandırılıb.
NDU-nun İnnovasiya Mərkəzində keçirilən tədbirdə universitetin sosial məsələlər və ictimaiyyətlə əlaqələr üzrə prorektoru dosent Nicat Yaqubov azərbaycançılıq ideologiyasının mahiyyətindən danışaraq bildirib ki, bu məfkurə təkcə milli-mənəvi dəyərlərin qorunması deyil, həmçinin milli kimliyə və dövlətə bağlılığın qürurla ifadəsidir. Yazıçı-alimin kitabları isə dövlətçilik ideologiyasını hərtərəfli, zəngin və əsaslı təqdim edən etibarlı mənbələrdir.
Naxçıvan Muxtar Respublikası Yazıçılar Birliyinin sədri Asim Yadigar “Alim-yazıçı Sadıq Qarayevin əsərlərində milli dövlətçiliyin elmi və bədii təsviri” mövzusunda, “Kredo” qəzetinin baş redaktoru Əlirza Xələfli “Azərbaycançılıq məfkurəsi və qələbənin vəhdəti elmi idrakın və bədii təfəkkürün işığında” mövzusunda çıxış ediblər.
Həmçinin NDU-nun Azərbaycan ədəbiyyatı kafedrasının müdiri dosent Nurlana Əliyevanın “Sadıq Qarayevin yaradıcılığında Qarabağ azadlığı: Tarixi Zəfərin izi ilə”, AMEA Tarix İnstitutunun aparıcı elmi işçisi dosent İlham Həsənovun “Azərbaycançılıq məfkurəsinin tarixi zəfər romanları”, NDU-nun Azərbaycan dilçiliyi kafedrasının müdiri dosent Elburus Vəliyevin “Yazıçının dilində mental dəyərlərin təzahürü və üslub norması məsələləri” mövzusunda çıxışları dinlənilib.
Bildirilib ki, Sadıq Qarayevin əsərlərində azərbaycançılıq, dövlətçilik, milli qürur və zəfər ruhu bədii, elmi aspektlərdən təqdim olunub. Bu əsərlərə nəinki ədəbiyyatçılar, eyni zamanda, tarixçilər, filosoflar, dilçi alimlər müraciət edərək araşdırma və yeni tədqiqat işləri hazırlaya bilərlər.
AMEA-nın Naxçıvan bölməsində keçirilən görüşdə bölmənin sədri akademik İsmayıl Hacıyev, yazıçı-alim Sadıq Qarayev, “Kredo” qəzetinin baş redaktoru Əlirza Xələfli, AMEA Tarix İnstitutunun aparıcı elmi işçisi dosent İlham Həsənov, Naxçıvan Muxtar Respublikası Yazıçılar Birliyinin sədri Asim Yadigar, AMEA Naxçıvan Bölməsinin İncəsənət, Dil və Ədəbiyyat İnstitutunun elmi işlər üzrə direktor müavini dosent Elxan Yurdoğlu və digər əməkdaşlar iştirak ediblər.
Görüşdə azərbaycançılıq ideallarının dövlətçiliyimizin möhkəmlənməsində, qələbələrimizdə rolundan bəhs edilib. Zəfərlərimizin gələcək nəsillərə və dünya xalqlarına çatdırılmasında bədii ədəbiyyatın mühüm rolu vurğulanıb. Görüş iştirakçıları bu baxımdan Sadıq Qarayevin əsərlərini yüksək qiymətləndiriblər.
Tədbirdə elmin və ədəbiyyatın qarşılıqlı əlaqəsi, müasir Azərbaycan ədəbiyyatının elmi-nəzəri əsasları, Naxçıvanda aparılan elmi-tədqiqat işlərinin istiqamətləri barədə geniş fikir mübadiləsi aparılıb.
Bölmənin digər xəbərləri
