YENİ KANALİZASİYA KOLLEKTORU İŞƏ SALINMIŞDIR
Bakının Nizami, Sabunçu, Suraxanı rayonları ərazisində çirkab sularının yığılmasının qarşısını alan kanalizasiya kollektoru tam gücü ilə işə düşmüşdür. Şəhərin ayrı-ayrı yerlərində yığılıb qalmış qurunt suları əvvəllər antisanitariya vəziyyəti yaradır, ekoloji tarazlığın pozulmasına səbəb olurdu. Yeni kanalizasiya kollektoru Bakı Şəhər İcra Hakimiyyətinin daxili imkanları hesabına inşa edilmiş, onun keçdiyi ərazidə ətraf abadlaşdırılmış, səliqə-sahman yaradılmışdır. Kollektor vasitəsilə qurunt suları Hövsandakı təmizləyici qurğulara axıdılacaqdır. Tikintiyə 20 milyard manatadək vəsait xərclənmişdir.
Zuğulba-Şüvəlan istiqamətində, Nizami rayonunun Darvin küçəsində də kanalizasiya xətlərinin tikintisinə başlanmışdır. Hazırda paytaxtın Yasamal, Nərimanov, Əzizbəyov, Xətai, Binəqədi rayonlarının ərazilərində də yeni kanalizasiya xətləri çəkilir. Bu işlər ilin sonunadək başa çatdırılacaqdır.
Bölmənin digər xəbərləri
