YEVLAXDA ŞAHMAT ÜZRƏ RESPUBLİKA BİRİNCİLİYİ KEÇİRİLİR
Yevlax, 2 noyabr (AZƏRTAC). Yevlax şəhərində respublikanın uşaq-gənclər şahmat məktəbləri arasında şəxsi komanda birinciliyinin finalı keçirilir.
Yevlax Şəhər Uşaq-Gənclər Şahmat Məktəbində keçirilmiş açılış mərasimində şəhər icra hakimiyyətinin başçısı Elmar Vəliyev, təhsil nazirinin müavini Elmar Qasımov, Respublika Təhsil İdman Məktəbinin direktoru Cəfər Hümmətov, Şahmat Federasiyasının baş katibi İbrahim Məmmədov iştirak etmişlər. Natiqlər idmana dövlət qayğısından, respublika şahmatçılarının beynəlxalq yarışlardakı uğurlardan danışmışlar.
Birincilikdə seçmə yarışlarda ilk 2 yeri tutmuş komandalar mübarizə aparırlar. Oğlanlardan və qızlardan ibarət komandalar FİDE-nin qaydalarına uyğun olaraq dairəvi sistem üzrə oynayırlar.
Birincilikdə respublikanın 24 rayon və şəhərindən 16 oğlan və 16 qız komandası iştirak edir. Oğlan komandalarının tərkibi 1993-cü il təvəllüdlü və daha kiçik yaşlı 64 şahmatçıdan, qızların komandaları isə 1997-ci il və daha kiçik yaşlı 32 şahmatçıdan ibarətdir.
Yarışlar noyabrın 8-dək davam edəcəkdir.
######
Bölmənin digər xəbərləri
