“Youth Inc.” startapını inkişaf etdirən gənc sahibkarlar üçün layihələrin qəbuluna başlayıb
Bakı , 27 yanvar, AZƏRTAC
“Youth Inc.” Biznes İnkubasiya Mərkəzi öz biznesinə başlamaq istəyən və hazırda startapını inkişaf etdirən gənc sahibkarlar üçün layihələrin qəbulunu elan edib. Mərkəz Azərbaycan gəncləri üçün ilk açıq tipli müstəqil biznes inkubator olaraq 20 gənc sahibkarın eyni vaxtda işləməsi üçün nəzərdə tutulub və şəhərin mərkəzində yerləşən ödənişsiz ofis məkanı, müvafiq texniki və ofis ləvazimatlarını, internetə çıxış və s. imkanlarını təklif edir.
Mərkəzdən AZƏRTAC-a bildirilib ki, gənc sahibkarlar müraciət edərək biznes inkubatorun rezidentinə çevrilə və inkubatorun təklif etdiyi bir çox imkanlardan və xidmətlərdən yararlana bilərlər.
Azərbaycanda 2013-cü ilin yanvar ayından uğurla həyata keçirilən “Youth Inc.” gənclərin sahibkarlıq proqramı “Coca-Cola” şirkəti, Gənclər və İdman Nazirliyi və DVC (“Vətəndaş Cəmiyyətində Debat” İctimai Birliyi) arasında imzalanmış memorandum əsasında fəaliyyət göstərir. “Youth Inc.”ın fəaliyyət dövrü ərzində proqram məzunları 8 biznes layihə həyata keçirib, 5 minə yaxın gənc proqram çərçivəsində təlim və seminarlarda iştirak edib.
"Youth Inc." Biznes İnkubasiya Mərkəzinin rezidenti olmaq üçün namizədlər www.youthinc.az/az/incubator-apply link vasitəsilə müraciət formasını doldurmalıdır. Müraciət formaları hər ayın 25-də “Youth Inc.”in ekspertləri tərəfindən qiymətləndiriləcək və perspektivli biznes-ideya və startapların müəllifləri ilkin müsahibəyə dəvət alacaqlar. Startapların istiqaməti üzrə heç bir məhdudiyyət qoyulmur. Müraciətlər 18-29 yaş arasında olan gənc sahibkarlar üçün açıqdır.
Bölmənin digər xəbərləri
