Zaqatala rayonu ərazisində meliorasiya-irriqasiya tədbirləri davam etdirilir
Zaqatala, 31 oktyabr (AZƏRTAC). Zaqatala rayonu ərazisində meliorasiya-irriqasiya tədbirləri, habelə ərazidən axan dağ çaylarında sahilbərkitmə işləri davam etdirilir.
Rayon icra hakimiyyətindən AZƏRTAC-a bildirmişlər ki, suvarma şəbəkəsinin əhatə dairəsinin genişləndirilməsi, suvarma suyundan səmərəli istifadə edilməsi məqsədilə cari ilin ötən dövrü ərzində “Meliorasiya və Su Təsərrüfatı” ASC rayon ərazisində 2 subartezian quyusunda təmir-bərpa, 22 quyuda təmir işləri həyata keçirmişdir. Eyni zamanda, 2 min hektardan çox əkin sahəsinin suvarılmasını təmin edəcək ikipilləli “Alazan” nasos stansiyasında təmir-bərpa işləri davam etdirilmiş, suvarma kanalları lildən təmizlənmişdir.
Bundan əlavə, yaşayış məntəqələri və əkin sahələrinin sel sularından mühafizəsini təmin etmək məqsədi ilə 600 metr uzunluğunda daş-beton bənd tikilmiş, 5 min 764 kubmetr həcmində daş-beton bəndlər təmir edilmiş, 400 kubmetr həcmində qabion bəndlər quraşdırılmış, habelə 868 min kubmetr həcmində çay yataqları qum, çınqıl və lildən təmizlənmişdir.
Bölmənin digər xəbərləri
