Zaqatalada əsrlərdən gələn el mərasimi - Maxara bayramı, birlik və həmrəylik günü VİDEO
Zaqatala, 12 may, AZƏRTAC
Azərbaycanın multikultural və tolerant bölgələrindən biri olan Zaqatalada 20-dən çox müxtəlif xalqın nümayəndələri əsrlərdir birlik və bərabərlik şəraitində yaşayır, öz mədəni-mənəvi dəyərlərini qoruyur və inkişaf etdirirlər.
AZƏRTAC-ın bölgə müxbiri xəbər verir ki, müxtəlif xalqların əsrlərdir birgə yaşadığı Zaqatala rayonunda yazın gəlişi müxtəlif el mərasimləri, bayramlarla qeyd olunur.
Rayonun Yuxarı Tala kəndinin sakinləri isə yazın gəlişini Günəş rəmzi olan “Maxara” el bayramı, mərasimi kimi qeyd edirlər. Bu bayram qədim ənənələrin yaşadılması ilə yanaşı həm də birlik və həmrəyliyin rəmzi sayılır.
Aprel və mayın yağışlı, soyuq havasından sonra Günəşin torpağı isitməsi ilə Yuxarı Tala kəndinin sakinlərində də canlanma hiss olunur. El mərasimlərinin təşkili üçün nəzərdə tutulan məhəllə bu gün daha canlıdır, daha qaynardır. Bir tərəfdə uşaqların səs-küyü, digər tərəfdə ocaq üstə sac qoyulub maxara bişirilir, başqa bir tərəfdə isə qazanlarda hədik hazırlanır. Bütün bunların hamısı kənd sakinlərinin öz vəsaiti, öz təşəbbüsü ilə həyata keçirilir.
Kənd ağsaqqalı Musa Musayev bildirir ki, o gözünü açandan bu adət-ənənəni görüb və zaman dəyişsə də nəsillər yenilənsə də el bayramları böyük coşqu ilə yaşadılır. Musa kişi onu da əlavə edir ki, məqsəd insanların mehribançılığını, ruzisini birgə bölüşmək və paylaşmaq ənənəsini yaşatmaq və gənc nəslə bunları aşılamaqdır.
Rəbiyyət Fətəliyeva səhər tezdən ailəliklə məclis yerinə gəldiklərini, əvvəldən qız-gəlinlərdən kimin, nə iş görəcəyinin bəlli olduğunu bildirir.
“Siz diqqətlə baxsanız görərsiniz ki, insanlar necə mehriban və fədakarlıqla iş görürlər. Burada nə hazırlanırsa hər kəs evindən gətirib”, - deyən ağbirçək qadın əlavə edir ki, ərazidə çadırlar qurulub, yaşlı qadınlar yemək işlərini, qız-gəlinlər süfrələrin bəzədilməsini həyata keçirirlər. Yəni burada kiməsə iş buyurmağa ehtiyac yoxdur. Hər kəs bacardığını edir ki, gələnlər maxaranın, hədiyin dadına baxınsın. Rəbiyyət nənə onu da əlavə edib ki, belə el mərasimlərinə uşaqları daha çox ona görə cəlb edirlər ki, onlar da bu adət-ənənəni öyrənsinlər.
Kənd sakinləri bildirir ki, el bayramının keçiriləcəyi gün əvvəldən bəlli olur və kənarda yaşayan bütün qohum-əqrəba, oğul-uşaq məclisə dəvət olunur. Məhəllənin bir kənarında qurulan çadır da iki hissədən ibarətdir. Biri qadınlar digəri isə kişilər üçün nəzərdə tutulub. El mərasiminə qatılanlar üçünsə bu bayram daha maraqlı və yaddaqalandır.
“Başqa kənddə yaşasam da uşaqlarımı gətirmişəm ki, həm öz yaşıdları ilə tanış olub oynasınlar, həm də belə bir el mərasiminin olduğunu, onun mahiyyətini anlasınlar. Bu el mərasimi son illər insanların bir-birindən uzaq düşməsinin qarşısını alan ən gözəl tədbirdir”, - deyə qonşu kənddən iki övladı ilə el mərasimində iştirak edən Günay Davudova bildirib.
El mərasimində ən çətin iş Cuma dayının üzərinə düşüb. Cuma Hacıyev təkcə Yuxarı Talada deyil rayonda, el-obada ən dadlı xörəklərin hazırlanması üzrə mahir aşpazlardan sayılır. O, səhərdən tüstülənən ocaqda hədik bişirməklə məşğuldur. Gördüyü işdən zövq alan Cuma Hacıyev bu il kənar kəndlərdən də xeyli qonaq gəldiyini deyir. Bu səbəbdəndir ki, 15 iri qazanda hədik hazırladıqlarını və hamısının tükəndiyini bildirir.
El mərasiminin keçirilməsinə ən çox sevinənlər isə əlbəttə ki, uşaqlardır.
Sakinlər bildirir ki, belə mərasimlərdə ilk öncə məclisə qatıla bilməyən ahıl, xəstə insanlara xüsusi pay ayrılaraq onlara çatdırılır, daha sonra uşaqlar doyurulur. El mərasiminin səhər saatlarından başlayaraq axşama kimi davam etdiyini deyən sakinlər bununla da birlik və bərabərliklərini ifadə etdiklərini xüsusi vurğulayırlar.
Müxbir - Rasim İslamoğlu
Bölmənin digər xəbərləri
